ខណៈដែលសាធារណជនទូទៅកើតក្ដីបារម្ភដោយសារតែតម្លៃប្រេងឥន្ទនៈកំពុងតែមានការកើនឡើងខ្លាំង ស្រាប់តែកញ្ញា សាន កុសុមៈ ប្រកាសចង់រកទិញសេះជិះ។
នៅថ្ងៃទី១៤ ខែមីនា ឆ្នាំ២០២២ តួឯកស្រី «មន្តស្នេហ៍អ្នកគ្រូពេទ្យឆ្នាស» និង «ដើមរលួសមាស» កញ្ញា សាន កុសុមៈ បានចេញមកចែករំលែកផុសមួយ ដែលជាផុសកំពុងតែមានការចែកចាយច្រើនលើបណ្ដាញសង្គម ដោយផុសនោះបានលើកឡើងពីហាងឆេងប្រេងសាំង ថ្ងៃម្សិលមិញ និងថ្ងៃនេះ។ កញ្ញាបានចែករំលែកផុសនោះដោយសរសេរថា «នៅណាមានលក់សេះអត់?»។
ងាកមកហ្វេនៗរបស់កញ្ញាដ៏ស្រស់សោភា អតីតធីតាឯកសង្ក្រាន្តឆ្នាំមុន បានចូលមក Comment ខាងក្រោមផុសរបស់កញ្ញា ដោយលើកឡើងថា «អាយដលទិញកង់ជិះទៅបានពីរនាក់ខ្ញុំ», «សូម្បីតែទេវតាហោះសោះ ក៏បារម្ភដែរ ចុះទម្រាំតែមនុស្សលោក», «ទេវតាចេះហោះសោះនៅភ័យសាំងឡើងថ្លៃចុះទម្រាំមនុស្សធម្មតាដូចខ្ញុំទៀតណ្ហើយបែបត្រូវជិះHuskyមួយរយះហើយ», «មានអីត្រូវបារម្ភ បើទេវតាជិះតែពពកហ្នឹង»។
ក្រៅពីស្រីស្អាត សាន កុសុមៈ ដែលបានចែករំលែកផុសខាងលើ សូម្បីតែលោក សុង វណ្ណា ហៅអេកូវ៉ាក់សុង ក៏បានចែករំលែកផុសតម្លៃសាំងព្រមទាំងលើកឡើងដែរថា «ជិះចានវិញហើយ លាហើយសង្សារចាស់»។
បើយោងតាមការបង្ហាញចំណាប់អារម្មណ៍របស់អ្នកលេងបណ្ដាញសង្គម ដែលចែករំលែកផុសរឿងប្រេងសាំងឡើងថ្លៃនេះហាក់បង្ហាញឱ្យឃើញថាមនុស្សមួយចំនួនធំកំពុងតែយកចិត្តទុកដាក់តាមដាន និងព្រួយបារម្ភច្រើនពីបញ្ហានេះ៕
ប្រភព៖ Kosamak San
