នៅសល់មិនដល់មួយថ្ងៃទៀតទេគឺចូលដល់ថ្ងៃរៀបចំពិធីមង្គលការកូនស្រីសំណព្វលោក សុវណ្ណ រិទ្ធី ហៅតា វ៉ិចទ័រហើយ បើមើលនៅលើបណ្ដាញសង្គមផលិតករកម្មវិធីកម្សាន្តរូបនេះតែងតែផុសរំលឹកជាញឹកញាប់នៅថ្ងៃជាក់លាក់រៀបចំកម្មវិធីមង្គលកូនស្រីបណ្ដូលចិត្ត។
នៅថ្ងៃទី១៩ ខែមីនា ឆ្នាំ២០២២ គឺជាថ្ងៃពេលាល្អនិងជាក់លាក់សម្រាប់អនាគតកូនកំលោះ-កូនក្រមុំថ្មោងថ្មីរវាងកញ្ញា នីឡា និងគូដណ្ដឹងរូបសង្ហា បន្ទាប់ពីអ្នកទាំងពីរបានពន្យារពេលម្ដងទៀតម្ដងហើយរហូតដល់អស់ជាង៣ឆ្នាំ។
ក្រៅពីសាមីខ្លួនដែលអរសប្បាយក្រោយរងចាំពេលាដ៏ពិសេសនេះយ៉ាងអន្ទះសាហើយនោះ ងាកមកលោកឪពុករបស់អនាគតកូនក្រមុំ នីឡា គឺលោក វ៉ិចទ័រ វិញ ក៏រំភើបនិងត្រេកអរមិនចាញ់កូនស្រីប៉ុន្មានដែរ ព្រោះតែកូនស្រីបណ្ដូលចិត្តតែម្នាក់គត់ជិតមានគូគាប់មកមើលថែរក្សានិងការពារជំនួសលោក។
ខណៈដែលនៅថ្ងៃស្អែកគឺជាថ្ងៃជ័យមង្គលថ្ងៃសិរីសួស្ដីសម្រាប់កូនស្រីលោក បើសង្កេតតាមរយៈបណ្ដាញសង្គមរបស់លោក វ៉ិចទ័រ មួយរយៈចុងក្រោយនេះលោកឧស្សាហ៍បង្ហោះពីកាលបរិច្ឆេទជាក់លាក់នៃកម្មវិធីរៀបការរបស់កូនស្រីលោកណាស់ដូចជានៅថ្ងៃទី១៦ លោកបានបង្ហោះប្រាប់ម្ដងហើយនៅថ្ងៃទី១៧ ម្សិលមិញនេះលោកក៏បានបង្ហោះប្រាប់ម្ដងទៀតពីពេលវេលាដែលកូនស្រីលោករៀបអាពាហ៍ពិពាហ៍។
«បងប្អូនជាទីរាប់អាន ថ្ងៃទី19/03/2022 ជាអាពាហ៍ពិពាហ៍ពិត របស់នីឡាកូនស្រីខ្ញុំបាទ។» នេះគឺជាការបង្ហោះនៅថ្ងៃទី១៧ ខែមីនា ឆ្នាំ២០២២
«នៅពីរថ្ងៃទៀត ដល់ថ្ងៃមង្គលការរបស់ កំពូលហើយ(នីឡា)គឺថ្ងៃទី19/03/2022។» នេះគឺជាការបង្ហោះនៅថ្ងៃទី១៦ ខែមីនា ឆ្នាំ២០២២
ក្រោយពីលោកតាវ៉ិចទ័របង្ហោះសារបង្ហាញពីថ្ងៃរៀបមង្គលការពិតប្រាកដរបស់កូនស្រីហើយនោះ ឃើញមានអ្នកគាំទ្រ បងប្អូន មិត្តភក្ដិ បានចូលមកអបអរសាទរចំពោះអនាគតកូនកំលោះកូនក្រមុំថ្មោងថ្មីគ្រប់គ្នា៕
ប្រភព៖ Rithy Sovann