ពិតជាដូចជាពាក្យចាស់ថា ទោះបានឃើញផ្ទាល់ភ្នែកក៏កុំអាលជឿ ទោះបានឮផ្ទាល់ត្រចៀកក៏កុំអាលវិនិច្ឆ័យ ល្គឹកណាមិនទាន់បានឆ្លងកាត់ញាណទាំង៥របស់យើងជាមុនសិននោះ តួយ៉ាងដូចជាករណីតារាហ្វេសប៊ុក Kaka Kh ដែលកំពុងតែរងនូវការរិះគន់បាញ់រះមិនសំចីមាត់ពីមហាជនដោយសារតែយល់ច្រឡំថាអ្នកនាង ចេញមកវាយប្រហារលើតារាចម្រៀង តន់ ចន្ទសីម៉ា ទាំងដែលការពិតនោះគឺពុំមែនដូច្នោះឡើយ។
កាលពីថ្ងៃទី២៣ ខែមីនា ឆ្នាំ២០២២ អ្នកនាង កាកា បានចេញឃ្លីបវីដេអូមួយដែលក្នុងឃ្លីបវីដេអូនោះអ្នកនាងបានធ្វើត្រាប់និងយកសម្ដីអ្នកបញ្ចេញមតិទើស ចំពោះឈុតរ៉ូបតារាចម្រៀងស្រីប្រចាំផលិតកម្ម Galaxy Navatra រួចទើបអ្នកនាងឆ្លើយតបទៅអ្នកទើសទាំងនោះយ៉ាងចាស់ដៃវិញថា «អ្នកទើសធ្វើការអ្វីដែរ?….អត់ទើសមួយថ្ងៃអត់បាយហូប?….ហើយអ្នកទើសគេនឹងអង្គការណាបើកលុយឱ្យ ម៉េចបានប្រឹងទើសគេម្ល៉េះ…។ល។»
យ៉ាងណាមិញវីដេអូឃ្លីបខាងលើរបស់ Kaka Kh បែរជារងព្រនង់សំពងឥតសំចីមាត់ពីអ្នកលេងបណ្ដាញសង្គមមួយចំនួនទៅវិញដោយសារតែអ្នកទាំងនោះយល់ច្រឡំថាបុគ្គលល្បីលើសង្គមអនឡាញរូបនេះចេញមកបង្ហាញមតិទើសចំពោះឈុតកញ្ញា តន់ ចន្ទសីម៉ាស្លៀកឡើងទទួលពានរង្វាន់ក្នុងកម្មវិធី Pleng Music Awards 2022 នាពេលកន្លងមក។
ឆ្លើយតបចំពោះមតិយល់ច្រឡំទាំងអស់ខាងលើចំពោះខ្លួនអ្នកនាង បានបង្ហោះឃ្លីបខ្លីមួយដើម្បីបញ្ជាក់ពីសេចក្ដីស្អាតស្អំរបស់ខ្លួន ព្រមទាំងសំណេរមួយខ្លីទៀតខាងក្រោមនោះថា៖ «អង្គុយមើលខំមែនគួរឲ្យអស់សំណើចអ្នកមួយចំនួន ប្រហែលមើលមើល ហើយក៏ខ្វេះគ្រាប់ភ្នែកយកទៅលាងពាក់កណ្ដាលផ្លូវ មិនបានមើលដល់ចប់… ហើយតាំងហាឡើងជេរ ឯង ថាជាអ្នក ទើសគេទៅវិញ…មិនអីទេខ្ញុំសប្បាយចិត្តព្រោះបាន សេចក្តីថាខ្ញុំសម្ដែងដល់អាចថតកុនបាន»
ខណៈដែលអ្នកមិនដឹងចូលមកទើសចំពោះមតិរបស់អ្នកម្ដាយកូនមួយរូបនេះ ប៉ុន្តែសាមីខ្លួនកញ្ញា តន់ ចន្ទសីម៉ា ឯណោះវិញ បានចូលមកខមមិនខាងក្រោមផុសអរគុណអ្នកនាង Kaka KH ខាងក្រោមអរគុណចំពោះការលើកឡើងគាំទ្រខ្លួនថា៖ «អរគុណបងដែលស្រលាញ់គាំទ្រប្អូន» ចំណែកហ្វេនៗបានចូលចុច Like ពេញចិត្តជិតមួយពាន់គណនី៕
ប្រភព៖ Kaka KH Australia
