តាមរយៈសារព័ត៌មាន Koreanboo បានចេញផ្សាយនៅថ្ងៃទី ៣១ ខែមីនា ឆ្នាំ២០២២នេះឱ្យដឹងថា Hyun Bin និង Son Ye Jin តួឯកប្រុសស្រីពីភាពយន្តភាគជាស៊េរី «Crash Landing on you» បានរៀបអាពាហ៍ពិពាហ៍យ៉ាងស្ងប់ស្ងាត់តាមលក្ខណៈជីវិតឯកជន។
ទីភ្នាក់ងារ VAST Entertainment បានបញ្ចេញរូបភាព២សន្លឹកនៅលើបណ្ដាញសង្គមអនឡាញន៍ ដោយភ្ជាប់ជាមួយឃ្លឹមសារថា៖ «អ្នកគាំទ្រទាំងអស់សូមជ្រាបថា ពិធីមង្គលការHyun Bin និង Son Ye Jinនឹងធ្វើឡើងជាលក្ខណៈឯកជន ដោយគិតពីស្ថានភាពបច្ចុប្បន្ននៃកូវីដ-១៩ ហើយយើងនឹងចែករំលែកព័ត៌មានលម្អិតអំពីពួកគេតាមរយៈរូបថតអាពាហ៍ពិពាហ៍របស់ពួកគេតែប៉ុណ្ណោះ»។ យ៉ាងណាមិញ គេបានឃើញ Hyun Bin និង Son Ye Jin កាន់ដៃគ្នា ហើយញញឹមស្រស់ស្រាយ។
ជាមួយគ្នានោះដែរ ខាង MS Team Entertainment បាននិយាយថា «ថ្ងៃនេះតារាសម្តែង Son Ye Jin និងតារាសម្តែង Hyun Bin រៀបចំពិធីមង្គលការរបស់ពួកគេហើយ ជាថ្ងៃដំបូងនៃការប្ដូរនាមទៅជាប្តីប្រពន្ធ។ ពិធីទាំងមូលរៀបចំជាលក្ខណៈឯកជនដោយពិចារណាលើស្ថានភាពជំងឺកូវីដ-១៩ ហើយយើងនឹងផ្តល់ព័ត៌មានតាមរយៈរូបថតអាពាហ៍ពិពាហ៍របស់ពួគេទាំងពីរ។ យើងសូមថ្លែងអំណរគុណយ៉ាងជ្រាលជ្រៅចំពោះការអបអរសាទរ និងការគាំទ្រដ៏កក់ក្តៅជាច្រើន នៃការចាប់ផ្ដើមជីវិតថ្មីរបស់គូស្នេហ៍មួយគូនេះ។ ជាការតបស្នងការទន្ទឹងរង់ចាំ យើងនឹងប្រឹងប្រែងឱ្យអស់ពីសមត្ថភាពបំពេញនូវក្តីស្រលាញ់ដែលអ្នកបានផ្ញើជូនតារាសម្ដែង Son Ye Jin និងក្រុមហ៊ុនរបស់យើង។ អរគុណ»។
ពិធីមង្គលការ Hyun Bin និង Son Ye Jin ថ្ងៃនេះធ្វើឡើងឯ Aston House នៅសណ្ឋាគារ Walker Hill ទីក្រុងសេអ៊ូល វេលាម៉ោង ៤រសៀល (ម៉ោងនៅកូរ៉េ)។ កាន់តែអធិកអធមទៀតនោះ ពិធីមង្គលការបស់អ្នកទាំងពីរក៏បានបន្លឺឡើងនូវបទចម្រៀង “Give You My Heart” ដែលជាបទ OST ពីភាពយន្តភាគជាស៊េរី «Crash Landing on you» ផងដែរ។
អត្ថបទពាក់ព័ន្ធ៖
សូមចូលអាន-Hyun Bin ព្យួរចោលការងារសម្ដែង១ឆ្នាំពេញដើម្បី ត្រៀមរៀបចំអាពាហ៍ពិពាហ៍ឆ្នាំ ២០២២
សូមចូលអាន-បែកធ្លាយរូបភាព Date ផ្លូវការរវាង Hyun Bin និង Son Ye Jin ក្រោយទាក់ទងគ្នាមួយរយៈ!
