ចង់ស្ដាប់បទថ្មីរបស់កញ្ញា ឈីន រតនៈ ដែរទេ? ឆ្លើយប្រាប់អ្នកសារព័ត៌មានសិល្បៈកម្សាន្តត្រយង កញ្ញា ឈីន រតនៈ បានឱ្យដឹងថាកញ្ញាត្រៀមបទចម្រៀងចូលឆ្នាំចំនួន៥បទ សម្រាប់បុណ្យចូលឆ្នាំថ្មី ប្រពៃណីជាតិ ឆ្នាំ២០២២ នេះ។
ជាមួយគ្នានេះដែរ សម្រាប់អបអរសាទរពិធីបុណ្យចូលឆ្នាំខ្មែរប្រពៃណីជាតិ នាប៉ុន្មានថ្ងៃខាងមុខនេះ តារាចម្រៀងស្រី ឈីន រតនៈ ក៏បានបញ្ចេញបទចម្រៀងទោលដែលមានចំណងជើងថា «ហួសឌឺឡេ» និងបទចម្រៀងគូ ៤បទផ្សេងទៀតដែលមានដូចជាបទ «ការឬសែន» «ស៊យហើយខ្ញុំញ៉ែប៉ះចំប្រពន្ធមេបុស្តិ៍ » «លុយបោក» និង«កំលោះខ្មែរក្រមុំខ្មែរ»។ ស្រីតូចច្រឡឹងរូបនេះសារភាពថា ខ្លួនមិនដែលច្រៀងបទចង្វាក់កន្ត្រឹមនោះទេ ដូច្នេះមានការលំបាកសម្រាប់ខ្លួនគួរសម។
កញ្ញា ឈីន រតនៈ ម្ចាស់បទ «ក្រមុំដេកយំមេម៉ាយដើរសើច» រូបនេះមានក្ដីរំភើបយ៉ាងខ្លាំងដែលបទចម្រៀងទីមួយ ច្រៀងរួមជាមួយនឹងដៃគូ លោក គង់ ចំរើន មានការគាំទ្រភ្លូកទឹកភ្លូកដីយ៉ាងដូច្នោះ។ កញ្ញាសង្ឃឹមថាបទចម្រៀងត្រៀមចេញថ្មីរបស់ខ្លួននឹងទទួលបានការគាំទ្រពីសំណាក់ហ្វេនៗ (អ្នកគាំទ្រ) ច្រើនមិនចាញ់បទមុន។
យ៉ាងណាមិញ តារាចម្រៀងស្រីនៅផលិតកម្មហង្សមាសរូបនេះ ក៏បានផ្ដាំទៅកាន់មហាជនអ្នកគាំទ្រថា ក្រៅពីអាជីពចម្រៀងហើយនោះ កញ្ញាក៏បានចាប់អាជីពថ្មីមួយទៀត គឺជាការសម្ដែងភាពយន្តវិញម្ដង ដែលស្នាដៃភាពយន្តដំបូងរបស់កញ្ញាគ្រោងនឹងត្រៀមបញ្ចេញឆាប់ៗខាងមុខនេះ៕
សូមទស្សនាវីដេអូចម្រៀងចូលឆ្នាំល្បីៗរបស់កញ្ញា ឈីន រតនៈ ៖
អត្ថបទពាក់ព័ន្ធ ឈីន រតនៈ ៖