តួអង្គសំខាន់ក្នុងភាពយន្ត«Surviving Bokator» និងជាគ្រូតាគុនល្បុក្កតោ ទទួលបានថវិកាឧបត្ថម្ភសម្រាប់ការវះកាត់ និងការថែទាំភ្នែក

លោក សាន គីមស៊ាន ត្រូវបានមហាជនស្គាល់ថា ជាគ្រូតាគុនល្បុក្កតោវ័យ៧៧ឆ្នាំ និងជាតួអង្គសំខាន់ក្នុងភាពយន្ត «ការរស់ឡើងវិញនៃគុនល្បុក្កតោ» ឬ Surviving Bokator ដែលជាវណ្ណកម្មសហភាពយន្ដខ្មែរ និងកាណាដា។ មុននេះបន្តិច សារព័ត៌មានត្រយងបានទទួលដំណឹងមកថា លោកត្រូវចូលមន្ទីរពេទ្យដើម្បីវះកាត់ភ្នែក ហើយលោកគ្រូក៏បានទទួលការឧបត្ថម្ភថវិកាមួយចំនួនសម្រាប់ថ្លៃវះកាត់ និងថែទាំភ្នែក ពីសំណាក់ថៅកែផលិតកម្ម រាម ។

ដោយឡែក អ្នកនាង ស្រីអូន ដែលជាចាងហ្វាយផលិតកម្មរាមបានរៀបរាប់នៅលើហ្វេសប៊ុករបស់ខ្លួនឱ្យដឹងថា លោកស្រៅនិងស្វាមីបានឧបត្ថម្ភថវិកា ៣០០០ដុល្លា សម្រាប់ការវះកាត់ភ្នែកជូនលោកគ្រូតា សាន គីមស៊ាន ដែលជាព្រឹទ្ធាចារ្យល្បុក្កតោបុរាណខ្មែរ។ យ៉ាងណាមិញ មួយរយៈគេសម្គាល់ឃើញថា ក្រុមហ៊ុនសម្រស់ធម្មជាតិ និងផលិតកម្មរាម បានចូលរួមសកម្មភាពលើកស្ទួយដល់ក្បាច់គុនល្បុក្កតោ ដើម្បីជាការសារ និងអបអរដែលគុណល្បុក្កតោខ្មែរ មានវត្តមានចូលស៊ីហ្គេម ២០២៣ ក្នុងនាមប្រទេសកម្ពុជាក្លាយជាម្ចាស់ផ្ទះផងដែរ។

នេះជាទឹកចិត្តដ៏ថ្លៃថ្លារបស់ផលិតកម្មរាម ដែលបានជួយថ្លៃព្យាបាលការវះកាត់ភ្នែករបស់លោកគ្រូ តាវ័យ៧៧ឆ្នាំ ដោយនេះជាការជួយរំលែកការលំបាក និងការគោរពស្រឡាញ់ចំពោះលោកគ្រូតា ដែលតែងតែបានខិតខំប្រឹងប្រែង ដើម្បីកិច្ចការអភិវឌ្ឍន៍វិស័យក្បាច់គុនព្រលឹងជាតិខ្មែរមួយនេះកាន់តែរីកចម្រើនជាបន្តបន្ទាប់។

ក្រៅពីជួយឧបត្ថម្ភថវិកាដល់គ្រូតាគុនល្បុក្កតោវ័យ៧៧ឆ្នាំហើយនោះ កន្លងទៅផលិតកម្មរាមក៏បានចូលរួមលើកស្ទួយ និងផ្សព្វផ្សាយពីគុនល្បុក្កតោខ្មែរ តាមរយៈបទចម្រៀងដែលមានចំណងជើងថា «អ្នកចម្បាំង» ដែលបទនេះកំពុងមានការចាប់អារម្មណ៍ខ្លាំងទាំងមជ្ឍដ្ឋានមហាជនទាំងក្នុងប្រទេស និងក្រៅប្រទេសផងដែរ។ យ៉ាងណាមិញ MV«អ្នកចម្បាំង» គឺចង់បំផុសទឹកចិត្តខ្មែរ ជួយផ្សាយវប្បធម៌កីឡាដើម្បីការប្រកួតកីឡា ស៊ីហ្គេម លើកទី៣២ ឆ្នាំ២០២៣ ៕