តារាសម្ដែង សាន កុសុមៈ បច្ចុប្បន្នក្ដាប់បានតំណែងតួឯកជាច្រើនរឿងបន្តបន្ទាប់គ្នា អាចនិយាយបានថានៅលើកញ្ចក់ទូរទស្សន៍ CTN មិនសូវបាត់មុខអតីតម្ចាស់តំណែងទេពធីតាសង្ក្រាន្តឆ្នាំឆ្លូវរូបនេះនោះឡើយ។ សម្រស់របស់កុសុមៈ កាលពីមុនអាចនឹងមានអ្នកសង្ស័យថាស្រីស្អាតរូបនេះពឹងកាំបិតពេទ្យ ប៉ុន្តែក្រោយពេលឃើញម្ដាយរបស់កញ្ញារួច គ្រប់គ្នាពិតជាជឿដោយគ្មានសង្ស័យថា សាន កុសុមៈ ស្អាតពីធម្មជាតិពិត។
ឈុតដកស្រង់ពីរឿង «នគរមាស» 
«មន្តស្នេហ៍អ្នកគ្រូពេទ្យឆ្នាស់»
កត្តាដែលធ្វើឱ្យ កុសុមៈ បានតំណែងជាតួឯកស្រីបន្តកន្ទុយគ្នានោះ ពិតណាស់ក្រៅពីសមត្ថភាពសម្ដែងបានល្អហើយនោះរូបសម្រស់គឺជាកត្តាចំបង។ តាមដឹងសម្រស់របស់កញ្ញា សាន កុសុមៈ គឺដោយសារតែហ្សែនតំណពូជពីខាងម្ដាយ ព្រោះក្រោយរូបភាពម្ដាយនិងកូនអ្នកទាំងពីរ ត្រូវបានបង្ហោះចែករំលែកមកខាងក្រៅ ទស្សនិកជនបានពោលសរសើរព្រោះតែសម្រស់ម្ដាយកញ្ញាក្មេងស្អាត មើលតែបងនិងប្អូនស្រី មិនមែនជាម្ដាយនិងកូននោះឡើយ។
ថ្មីៗនេះតួឯកស្រី «មន្តស្នេហ៍អ្នកគ្រូពេទ្យឆ្នាស់» ឧស្សាហ៍បង្ហោះរូបភាពជាមួយនឹងអ្នកម្ដាយរបស់ខ្លួនណាស់ នោះអាចដោយសារតែជិតចូលដល់ខែនៃទិវាអ្នកម្ដាយអន្តរជាតិក៏បាន ដូចជាកាលពីថ្ងៃទី២៣ កញ្ញាបានផុសរូបភាពកាលពីក្មេង និងរូបភាពបច្ចុប្បន្នជាមួយនឹងអ្នកម្ដាយ ដោយភ្ជាប់ជាមួយនឹង hashtag Happy mother day ថែមទៀតផង។
ក្រុមគ្រួសាររបស់កញ្ញា សាន កុសុមៈ អាចជាគ្រួសារអ្នកមានចិត្តបុណ្យ ព្រោះកាលពីថ្ងៃទី១៣ ខែមេសា ពោលគឺនៅមុនបុណ្យចូលឆ្នាំប្រពៃណីមួយថ្ងៃ កញ្ញានិងអ្នកម្ដាយបាននាំយកទឹកប្រាក់អំណោយសប្បុរសធម៌ផ្ទាល់ខ្លួននិងពីសប្បុរសជនសរុប ២០០០$ (២ពាន់ដុល្លារ) ទៅជួយមន្ទីរពេទ្យគន្ធបុប្ផា៕
