អ្នកច្នៃម៉ូដដ៏ល្បី និង ជាគ្រូបង្ហាត់បង្រៀនដើរម៉ូដលោក អូលីវ៉ា គង់ បានប្រកាសប្រឆាំងដាច់ខាតហើយថែមទាំងព្រមានប្លុកមិត្តភក្ដិណាដែលគាំទ្រទង្វើមួយនេះនៅលើហ្វេសប៊ុកថែមទៀតផង។
នៅរសៀលថ្ងៃទី២២ ខែឧសភា នេះ លោក អូលីវ៉ា គង់ បានធ្វើការប្រកាសដោយចំហលើគណនីហ្វេសប៊ុករបស់លោកបង្ហាញពីការមិនគាំទ្រទង្វើនិងសកម្មភាពក្នុងការប្រើប្រាស់ភាសាខៀវនោះទេ លោកថែមទាំងណែនាំចំពោះអ្នកដែលយកភាសាជាតិមកលេងសើច ឱ្យមានការភ្ញាក់ខ្លួន ព្រោះអាចនាំឱ្យមានការខាតបង់ក៏ថាបាន។
«Friend ហ្វេសប៊ុកខ្ញុំណាគាំទ្រទង្វើនេះ ឬប្រព្រឹត្តទង្វើដូចនេះ ខ្ញុំសូមប្លុកចោលដោយមិនមានលក្ខខណ្ឌ បើអស់លោកមិនជួយជ្រោមជ្រែងលើការប្រើភាសាជាតិឱ្យបានល្អទេ សូមកុំរួមគ្នាបំផ្លាញឱ្យសោះ ភ្ញាក់ខ្លួនឡើង។ កុំលេងសើចនឹងរឿងដែលនាំឱ្យខាតបង់ ក្រែងវាវិនាសដោយមិនដឹងខ្លួន។»
ភាសាខៀវដែលយុវវ័យយកមកប្រើប្រាស់នេះគឺការយកពាក្យមួយម៉ាត់មកផ្សំជាមួយនឹងពាក្យខៀវហើយគន្លាស់ដើម្បីឱ្យចេញជាអត្ថន័យ ឧទាហរណ៍ដូចជាពាក្យថាអ្នកនិយាយពាក្យទៅ អ្នកត្រូវយកពាក្យខៀវបូកទៅស្មើនឹងថាចេញជាពាក្យថា ទៀវខូវដែលគន្លាស់បានជាទៅខៀវ ច្បិចយកតែពាក្យខាងមុខមកកាត់ជាន័យដែលពាក្យថា ទៀវខូវនេះ មានន័យស្មើនឹងពាក្យថាទៅ។
សំណេរបដិសេធមិនគាំទ្រឱ្យយកភាសាជាតិមកប្រើជាលក្ខណៈលេងសើចរបស់លោក អូលីវ៉ា គង់ ទទួលបានការអបអរសាទរនិងកោតសរសើរ ពីមិត្តភក្ដិលើបណ្ដាញសង្គមយ៉ាងច្រើនក្រោយពីលោកបានបង្ហោះចេញរួចមក៕
