មហាជនភាគតិចណាស់ដែលបានស្គាល់អ្នកនាង កាក់ ចន្ធី ជាតារាចម្រៀងរ៉ុកអេនរ៉ូលប្រចាំប្រទេសកម្ពុជា ប៉ុន្តែគេបានស្គាល់តែបទចម្រៀង «យប់នេះចង់ញ៉ាំស្រា» ឬ Woman Wants To Drink ជាបទពេញនិយមស្ដាប់នាសព្វថ្ងៃនេះ និងជាស្នាដៃចុងក្រោយមុនពេលអ្នកនាងបានមរណភាព។
ដំណើរជីវិតតស៊ូ កម្រត់ រហូតបានក្លាយជាអ្នកចម្រៀងនៅរាជធានីភ្នំពេញ ត្រូវបានផលិតជាខ្សែភាពយន្តឯកសារ ដែលមានចំណងជើងថា ៖ «The Cambodian Space Project – Not Easy Rock ‘N’ Roll» ពីផលិតករ Marc Eberle នាឆ្នាំ២០១៥។
ភាពយន្តនេះបានលាត្រដាងអំពីជីវិតពិតរបស់អ្នកនាង កាក់ ចន្ធី ដែលអំឡុងឆ្នាំ២០០៩ នៅហាងខារ៉ាអូខេមួយនៅភ្នំពេញ តន្ត្រីករអូស្ត្រាលី Julien Poulson បានឮសំឡេងដ៏អស្ចារ្យរបស់នារីភូមិក្រីក្រម្នាក់ឈ្មោះ ស្រីធី។ ស្រីធី ចូលចិត្តបទចម្រៀង Rock ‘N’ Roll ពីសម័យកាលមាសរបស់ប្រទេសកម្ពុជា ក្នុងទសវត្សរ៍ឆ្នាំ ១៩៦០ និង ៧០។ តន្ត្រីករអូស្ត្រាលីបានចាប់ចិត្តលើស្រីធី និងបង្កើតគម្រោងមួយដែលឱ្យឈ្មោះថា “គម្រោងលំហអាកាសកម្ពុជា” ដែលគម្រោងនេះ ជាការបំផុតពីតន្ត្រីបែបរ៉ុកRock ‘N’ Roll ដ៏រំភើប មានការចាប់អារម្មណ៍ច្រើនពីមហាជននៅទីក្រុងឡុងដ៍ ប៉ារីស ហុងកុង និងស៊ីដនី។ មហាជនទូទាំងពិភពលោកភ្ញាក់ផ្អើលនិងគាំទ្រសំឡេងរបស់តារាចម្រៀងពីទសវត្សរ៍ឆ្នាំ ក្នុងទសវត្សរ៍ឆ្នាំ ១៩៦០ និង ៧០ របស់កម្ពុជា។ ស្រីធី ក៏ក្លាយជាសិល្បការិនីចម្រៀងរ៉ុកអេនរ៉ូលប្រចាំប្រទេសកម្ពុជាមានគាំទ្រខ្លាំងតាមរយៈគម្រោងនោះ និងរួមដំណើរក្រុមតន្ត្រីរ៉ុករបស់ Nick Cave និង MC5’s Wayne Kramer។
ដោយភាពភាពយន្តឯកសារជីវិតតស៊ូរបស់អ្នកនាង កាក់ ចន្ធី បានធ្វើដំណើរទៅនបញ្ចាំងនៅតាមមហោស្រពភាពយន្តអន្តរជាតិទូទាំងពិភពលោក ហើយទទួលបានការកោតសរសើរនិងវាយតម្លៃថាជាភាពយន្តល្អដាច់គេ។ ចំណែកឯកនៅក្នុងតារាងដាក់ពិន្ទុរភាពយន្តពិភពលោក IMDB គេឃើញមានមហាជនបោះឆ្នោតឱ្យភាពយន្តមួយនេះ ក្នុងពិន្ទុរ 8.3 ដែលពិន្ទុរខ្ពស់ល្អសម្រាប់ភាពយន្តឯកសាររបស់កម្ពុជា។ ភាពយន្តនេះក៏ធ្លាប់បានចាក់បញ្ចាំងនៅកម្ពុជាដែរ តាមរយៈកម្មវិធីមហោស្រពភាពយន្តអន្តរជាតិកម្ពុជា។
គេនៅចាំបានថា អ្នកនាងកាក់ ចន្ធី បានបាត់បង់ជីវិតក្នុងគ្រោះថ្នាក់ចរាចរណ៍ទាំងវ័យ ៣៨ ឆ្នាំមួយកាលពីយប់រំលងអាធ្រាត្រឈានចូលថ្ងៃទី២០ ខែមិនា នៅតាមបណ្ដោយផ្លូវម៉ៅសេងទុង រាជធានីភ្នំពេញ ។ កាលណុះ អ្នកនាងបានបន្សល់ទុកកូនប្រុសម្នាក់អាយុ ១៣ឆ្នាំ ហើយសពត្រូវបានបញ្ជូនទៅបូជានៅស្រុកកំណើតនៅខេត្តព្រៃវែងតាមប្រពៃណីព្រះពុទ្ធសាសនា។ រហូតមកទល់សព្វថ្ងៃនេះ គឺសល់តែសំឡេងម្ចាស់បទ «យប់នេះចង់ញ៉ាំស្រា» ដែលមានការគាំទ្រខ្លាំងនៅលើបណ្ដាញសង្គម តែគួរឱ្យស្ដាយម្ចាស់បទបានស្លាប់ជិត៤ឆ្នាំមកហើយ៕
សូមរីករាយទស្សនាវីដេអូ៖
