សិល្បៈអន្តរជាតិ – Selena Gomez បានសុំទោសចំពោះនាង Hailey Bieber ភ្លាមៗក្រោយពេលដែលមានរឿងរ៉ាវចម្រូងចម្រាសរហូតឈានដល់អ្នកគាំទ្រនាងបានរិះគន់និងសើចចំអកខ្លាំងភរិយា Justin Bieber។
ជាច្រើនឆ្នាំហើយដែល Justin Bieber និង Selena Gomez បានចែកផ្លូវនិងបញ្ចប់សម្ព័ន្ធភាព ប៉ុន្តែរឿងរ៉ាវស្នេហារវាងអ្នកទាំងពីរសម្រាប់បេះដូងអ្នកគាំទ្រនៅតែមិនទាន់អាចបញ្ចប់ជាពិសេសអាពាហ៍ពិពាហ៍របស់ Justin និងភរិយា Hailey ប្រៀបដូចជាខ្យល់បកលើភ្លើងដែលធ្វើឱ្យរឿងនេះកាន់តែឆេះសន្ធោសន្ធៅឡើងវិញ។
ប៉ុន្មានថ្ងៃមុននេះពោលគឺនៅថ្ងៃព្រហស្បតិ៍ Hailey Bieber បានបង្ហោះវីដេអូមួយនៅលើ Profile របស់នាង ដោយចែករំលែកវិធីសាស្ត្រថែរក្សាសម្ផស្សជាប្រចាំរបស់ខ្លួន។ ៥ម៉ោងក្រោយស្រាប់តែ Selena បានបង្ហោះវីដេអូស្រដៀងគ្នានេះដែរ ដោយហ្វេនៗយល់ឃើញទង្វើនិងសកម្មភាពរបស់នាងកំពុងតែចំអកដល់ Hailey។
ក្រោយមានការរិះគន់យ៉ាងច្រើន Selena Gomez នៅតែបញ្ចេញសារសុំទោស ទោះជានាងមិនបានលើកយកឈ្មោះ Hailey Bieber មកនិយាយចំៗក្ដី។
«សម្រាប់រឿងបែបនេះខ្ញុំគិតថា ពួកយើងគួរតែថែរក្សាសុខភាពផ្លូវចិត្ត អ្វីដែលខ្ញុំធ្វើខ្ញុំគ្មានចេតនាអ្វីបង្កប់នោះឡើយ ប៉ុន្តែខ្ញុំនៅតែសុំទោស។ ខ្ញុំគ្មានបំណងអាក្រក់នោះទេ។ ខ្ញុំនឹងប្រញាប់លុបវីដេអូនេះចោលភ្លាម។ នេះគឺជាការលើកឡើងរបស់តារាសម្ដែងរឿង «Spring Breakers»។ ទោះជាមកដល់ពេលនេះនាងមិនទាន់បានលុបចោលវីដេអូនោះក្ដីប៉ុន្តែនាងបានបិទមិនឱ្យ Comment បានទៀតនោះទេ៕
ប្រភព៖ marcar
