ក្រោយគ្រោះថ្នាក់ចរាចរណ៍ដែលបង្កឡើងដោយរថយន្ត SUV បើកបរដោយ Kim Sae Ron កាលពីពេលថ្មីៗនេះ ត្រូវបានសារព័ត៌មាន YTN កាត់យករូបភាពពីក្នុងកាំមេរ៉ាសុវត្ថិភាព (CCTV) នៅកន្លែងកើតហេតុយកមកផ្សព្វផ្សាយចេញមកខាងក្រៅ ក៏បង្កឱ្យមានមតិសាធារណៈបានរិះគន់លើតារាស្រីនេះរូបនេះ។
នៅក្នុងរូបភាពបានបង្ហាញឱ្យឃើញថាតារាស្រី Kim Sae Ron បានបត់មកខាងផ្លូវធំខាងឆ្វេង ប៉ុន្តែឡានបែរជាជ្រុលចង្កូតហើយបើកឡើងខឿន ក្រោយមកឡានមិនបានឈប់ស្ងៀមនោះទេ ប៉ុន្តែបានបើកថយក្រោយហើយបន្តបើកលើផ្លូវជាបន្តទៀត។
សាធារណជនដែលបានមើលឃើញវីដេអូនោះបានបង្ហាញអារម្មណ៍ខកចិត្តចំពោះទង្វើខ្វះការពិចារណានិងទំនួលខុសត្រូវរបស់តារាស្រីរូបនេះ ដែលនៅតែបន្តបើកបរទៀត ដោយគេយល់ឃើញថាការបើកបរបែបនេះស្ថិតក្នុងស្ថានភាពគ្រោះថ្នាក់ដល់អ្នកបើកបរផ្សេងទៀតនិងអ្នកធ្វើដំណើរឆ្លងផ្លូវ។
«នាងគួរតែឈប់ឡានក្រោយកើតមានគ្រោះថ្នាក់ដំបូង។ ខ្ញុំមិនចង់ជឿសោះថានាងបានបើកឡានបន្តទៀត»,«វ៉ាវ! មើលទៅនាងមិនខ្លាចអីសោះ។ ខ្ញុំស្ទើតែមិនជឿទេថានាងនៅតែបន្តបើកបរទៀតទោះជាកើតហេតុគ្រោះថ្នាក់ក្ដី។ ចុះបើនាងបើកបុកអ្នកធ្វើដំណើរថ្មើជើងគិតយ៉ាងម៉េច?», «សំណាងណាស់ដែលគ្មានអ្នកណាម្នាក់រងរបួស», «បើកុំតែបានកាប៊ីនភ្លើងទប់ប្រហែលជាអាចនឹងមានកើតគ្រោះថ្នាក់ធ្ងន់ធ្ងរជាងនេះមិនខាន»,«សំណាងណាស់គ្មានអ្នកណាម្នាក់រងរបួស។ ល្អហើយដែលនោះគឺជាកាប៊ីនភ្លើងបើសិនជាមនុស្សប្រហែលជាទៅបាត់ហើយ។ សង្ឃឹមថា DUIs ចាត់ការដាក់ទោសនាងឱ្យធ្ងន់ធ្ងរ»។
នៅព្រឹកថ្ងៃទី១៨ ខែឧសភា តារាសម្ដែង Kim Sae Ron ត្រូវបានចាត់ទុកថាបើកបរក្នុងស្ថានភាពស្រវឹង។ អ្នកនៅកន្លែងកើតហេតុលើកឡើងថាតារាស្រីរូបនោះស្រវឹងខ្លាំងរហូតមិនអាចនិយាយគ្នាដឹងរឿង។ ប៉ុន្តែតារាស្រីរូបនេះបដិសេធមិនព្រមតេស្ដតាមឧបករណ៍ផ្លុំខ្យល់ ដូច្នេះហើយទើបបញ្ជូនទៅកាន់មន្ទីរពេទ្យក្បែរៗនោះដើម្បីតេស្តឈាមវិញ។
ការបើកបុកឧបករណ៍បញ្ជូនអគ្គិសនីរបស់ Kim Sae Ron បានធ្វើឱ្យផ្ដាច់ចរន្តអគ្គីសនីដែលបញ្ជូនទៅភ្លើងសញ្ញាចរាចរណ៍ បង្កឱ្យមានការកកស្ទះនិងធ្វើឱ្យអ្នកដំណើរតាមដងផ្លូវធ្វើការត្រូវពន្យាពេល។
សាក្សីនៅកន្លែងកើតហេតុបាននិយាយថានៅពេលដែលនាងបើករថយន្តថយក្រោយនោះគឺក្នុងរថយន្តមានដឹកមនុស្សមកជាមួយដែរ ប៉ុន្តែមនុស្សដែលមកជួយនោះមិនត្រូវបានបញ្ជាក់អត្តសញ្ញាណថាជាអ្នកណាម្នាក់ឡើយ៕