ក្រុមបាល់ទះជម្រើសជាតិក្នុងសាលរបស់កម្ពុជា បានប្រកួតចាញ់ក្រុមម្ចាស់មេដាយមាស១០សម័យកាលឥណ្ឌូណេស៊ី ដោយលទ្ធផល ៣សិតទល់១សិត នៅរសៀលថ្ងៃសុក្រ ទី២០ ខែឧសភា ឆ្នាំ២០២២ នេះក្នុងវគ្គពាក់កណ្ដាលផ្ដាច់ព្រ័ត្រ ក្នុងព្រឹត្តិការណ៍កីឡាស៊ីហ្គេមលើកទី៣១ នៅប្រទេសវៀតណាម។
លទ្ធផលវគ្គពាក់កណ្ដាលផ្ដាច់ព្រ័ត្រនេះ ឥណ្ឌូណេស៊ី បានយកឈ្នះកម្ពុជា នៅក្នុងសិតទី១ ដោយលទ្ធផល ២៥ទល់១៨ ហើយសិតទី២ បន្តឈ្នះដោយលទ្ធផល២៥ទល់១៥ តែសិតទី៣ ក្រុមកម្ពុជា យកឈ្នះវិញដោយលទ្ធផល ២៥ទល់២២ និងសិតទី៤ ឥណ្ឌូណេស៊ី បន្តឈ្នះដោយលទ្ធផល២៥ទល់១៦។
ក្រោយបរាជ័យវគ្គពាក់កណ្ដាលផ្ដាច់ព្រ័ត្រ ក្រុមកម្ពុជា រង់ចាំអ្នកចាញ់ក្នុងវគ្គដូចគ្នានេះដែរ រវាងវៀតណាម ជាមួយថៃ នៅវេលាម៉ោង៥ល្ងាច ដើម្បីដណ្តើមមេដាយសំរឹទ្ធិ ខណៈក្រុមឥណ្ឌូណេស៊ី រង់ចាំអ្នកឈ្នះរវាងថៃ និងវៀតណាម ដើម្បីដណ្តើមមេដាយមាស៕