កូរ៉េខាងត្បូង – ក្រុមចម្រៀងដ៏មានឥទ្ធិពលរបស់កូរ៉េខាងត្បូង BTS នឹងចូលរួមក្នុងកិច្ចសន្ទនាពិសេសមួយជាមួយនឹងលោកប្រធានាធិបតីអាមេរិក Joe Biden ស្ដីអំពីអ្នកហាវ៉ៃសញ្ជាតិអាស៊ី-អាមេរិក និងអ្នកកោះបាស៊ីហ្វិក។
នៅថ្ងៃអង្គារទី៣១ ខែឧសភា ក្រុម BTS នឹងធ្វើដំណើរទៅកាន់វិមានប្រធានាធិបតីអាមេរិក (White House) ដើម្បីពិភាក្សាពីប្រធានបទអ្នកតំណាងជនជាតិអាស៊ី និង ការកើនឡើងនៃឧក្រិដ្ឋកម្មប្រឆាំងការស្អប់ខ្ពើមចំពោះជនជាតិអាស៊ីជាច្រើនឆ្នាំកន្លងមកនេះ។ នៅក្នុងសន្និសីទសារព័ត៌មាន BTS និង Biden ក៏នឹងពិភាក្សាគ្នាអំពីរឿងរ៉ាវជាច្រើនផ្សេងទៀត ដោយក្នុងនោះ BTS ក៏នឹងយកកិត្តិនាមជាលក្ខណៈសកលរបស់ខ្លួនមកជួយផ្សព្វផ្សាយសារនេះ។ យ៉ាងណាចំពោះកិច្ចសន្ទនាលម្អិតណាមួយនោះនូវមិនទាន់ត្រូវបានទម្លាយចេញមកខាងក្រៅនោះឡើយ ប៉ុន្តែនឹងមានផ្សព្វផ្សាយក្នុងពេលឆាប់ៗនេះ។
ការចូលជួបប្រធានាធិបតីនៅ White House របស់ BTS នេះកើតឡើង មួយឆ្នាំក្រោយពេលដែល BTS បានប្រកាសយ៉ាងទូលំទូលាយពីការប្រឆាំងចំពោះការរើសអើងពូជសាសន៍ជនជាតិអាស៊ី បន្ទាប់ពីកើតមានហេតុការណ៍ហិង្សាច្រើនឡើងនៅសហរដ្ឋអាមេរិក។ «ពួកយើងថ្កោលទោសចំពោះអំពើហិង្សា។ អ្នក ខ្ញុំ និងពួកយើង មានសិទ្ធដើម្បីទទួលបានការគោរព។ ពួកយើងឈរជាមួយគ្នា»។
កន្លងមកក្រុម BTS ក៏ធ្លាប់បាននិយាយដល់ការរើសអើងដែលក្រុមខ្លួនបានឆ្លងកាត់ផងដែរ៖ «ពួកយើងត្រូវអត់ទ្រាំនឹងការជេរប្រមាថដោយគ្មាហេតុផល ហើយត្រូវបានគេសើចចំអកចំពោះរូបរាងរបស់ពួកខ្ញុំផងដែរ»។ ក្រុមនេះបានបន្តទៀតថា បទពិសោធទាំងអស់នេះវាគ្រប់គ្រាន់ធ្វើយើងមានអារម្មណ៍ថាគ្មានអំណាចនិងទាញយើងឱ្យចេញឆ្ងាយពីការគោរពខ្លួនឯង … អ្វីដែលកើតឡើងពេលនេះមិនអាចដកយើងចេញពីអត្តសញ្ញាណនៃជនជាតិអាស៊ីរបស់យើងឡើយ។
ក្រៅពីការត្រៀមខ្លួនចូលជួបប្រមុខដឹកនាំកំពូលរបស់អាមេរិកហើយនោះក្រុមចម្រៀង BTS ក៏នឹងត្រៀមចេញអាល់ប៊ុម Anthology នៅថ្ងៃទី១០ ខែមិថុនា ខាងមុខនេះផងដែរ៕
ប្រភព៖ AP