ក្រុមបាល់ទាត់សូលទីឡូអង្ករ (Soltilo Angkor FC) បានបញ្ចប់ការប្រកួត៣លើកហើយ ក្នុងពានរង្វាន់លីគកំពូលកម្ពុជា Metfone Cambodian League ខណៈអ្វីដែលគួរឱ្យចាប់អារម្មណ៍នោះគឺកីឡាករ កែវ សុផល ដែលជាកីឡាករចាស់ទុំនៅក្នុងក្រុម ត្រូវបានអាជ្ញាកណ្ដាលពិន័យកាតក្រហម២លើកជាប់គ្នា ក្នុងពេលបង្ហាញខ្លួន៣លើកមកនេះ។
ប្រកួតដំបូងពេលសូលទីឡូអង្គរ ចាញ់ក្រុមភ្នំពេញក្រោន ៧ទល់១ នៅថ្ងៃទី៦ ខែកុម្ភៈ ឆ្នាំ២០២១ ក្នុងកីឡដ្ឋាន SRU Stadium កីឡាករ កែវ សុផល ត្រូវលោកអាជ្ញាកណ្ដាល ឃិន ឧសីហា ពិន័យកាតក្រហមក្រោយការប្រកួតចាប់ផ្ដើមបានត្រឹម១នាទីប៉ុណ្ណោះ។
នៅប្រកួតលើកទី២របស់ក្រុមសូលទីឡូអង្គរ ពេលចាញ់ក្រុមម្ចាស់ផ្ទះខេត្តព្រៃវែង ៦ទល់០ នៅថ្ងៃទី១៦ ខែឧសភា ឆ្នាំ២០២១ កីឡាកររូបនេះមិនអាចចូលលេងបានទេព្រោះជាប់ពិន័យ។
ប្រកួតលើកទី៣ ពេលក្រុមសូលទីឡូអង្គរ ប្រកួតចាញ់ក្រុមគីរីវង់សុខសែនជ័យ ២ទល់១ លើទីលានកីឡដ្ឋាន SRU Stadium នៅថ្ងៃទី២២ខែ ឧសភា ឆ្នាំ២០២១ កីឡាករ កែវ សុផល បានបង្ហាញខ្លួនឡើងវិញ នឹងត្រូវលោកអាជ្ញាកណ្ដាល ផៃ វិសាល ពិន័យកាតក្រហមនៅនាទី ៩០+៤។
កីឡាករ កែវ សុផល ជាកីឡាករគំរូម្នាក់ ហើយរូបគេធ្លាប់ជាគ្រូបង្វឹកក្នុងក្រុមបែបមហាជន Nex Step FC នៅខេត្តសៀមរាប ខណៈរូបគេបានចូលរួមជាមួយក្រុមសូលទីឡូអង្គរតាំងពីបង្កើតឡើងដំបូងឆ្នាំ២០១៧ មកម៉្លេះ។
គិតត្រឹមពេលនេះឆ្លងកាត់២៦ប្រកួតក្នុងលីគកំពូលកម្ពុជា មានកីឡាករ ៣រូបហើយដែលត្រូវបានអាជ្ញាកណ្ដាលពិន័យកាតក្រហម ៤សន្លឹក ក្នុងនោះមានកីឡាករ កែវ សុផល ២ដង កីឡាករ ឡាយ រស្មី របស់អាស៊ីអឺរ៉ុប ១ដង និងកីឡាករ សេង សារ៉ាវុទ្ធី របស់គីរីវង់សុខសែនជ័យ ១ដង៕
រូបថត៖CNCC