អាមេរិក – ក្រុមផលិតភាពយន្តបានចេញមកប្ដេជ្ញាចិត្តថាភាពយន្តដែលរកចំណូលបានខ្ទង់រាប់ពានលានដុល្លារអាមេរិកនឹងផលិតរដូវកាលទីពីរ ហើយតួឯកប្រុស Joaquin Phoenix ម្ចាស់ពានរង្វាន់អូស្ការនឹងបន្តដើរជាតួអង្គឯក Joker ដដែល។
យោងតាមសារព័ត៌មាន Variety កាលពីថ្ងៃទី៨ ខែមិថុនា ឆ្នាំ២០២២ អ្នកដឹកនាំ Todd Phillips បានបង្ហើបឱ្យដឹងថារដូវកាលទីពីរ ឬវគ្គទីពីរនៃសាច់រឿង Joker មានឈ្មោះថា៖ «Joker: Folie à Deux»។ ចំណែកប្រយោគភាសាបារាំងមានន័យថា៖ «Madness For Two» ខណៈដែលពាក្យ Folie à Deux ក៏ជាឈ្មោះជំងឺផ្លូវចិត្តម្យ៉ាង ដែលកើតឡើងដោយមនុស្សពីរនាក់បានកើតជំងឺផ្លូវចិត្តក្រោយរស់នៅជាមួយគ្នា។
Todd Phillips ក៏បានបង្ហោះរូបភាពដែល Joaquin Phoenix កំពុងអង្គុយអានសេណារីយ៉ូរឿងរដូវកាលទីពីរ។ បើងាកមើលកាលពីវគ្គតួឯកប្រុសដែលកើតនៅឆ្នា១៩៧៤ បានឈ្នះពានរង្វាន់តួឯកប្រុសឆ្នើមក្នុងកម្មវិធីប្រកាសពានរង្វាន់អូស្ការឆ្នាំ ២០២២ តាមរយៈការសម្ដែងតួជា Joker។
ដើម្បីដើរតួអង្គជា Joker បានល្អឥតខ្ចោះ Joaquin បានសម្រកទម្ងន់រហូតដល់ទៅ ២៣.៥គីឡូនិងប្រើរយៈពេលរាប់ខែចុះស្រាវជ្រាវស្នាមញញឹមនិងសំណើចរបស់អ្នកជំងឺផ្លូវចិត្ត។ កាលពីឆ្នាំ២០១៩ នៅពេលដែលរឿង Joker បានចាក់ផ្សាយ ទស្សនិកជនបានសរសើរច្រើនពីអ្នកទស្សនា ហើយអ្នករិះគន់ក៏មានមិនតិចនោះដែរ។
ភាពយន្ត Joker រកបានប្រាក់ចំណូលទូទាំងពិភពលោកចំនួនជាង១ពាន់លានដុល្លារនៅលើ Box Office នេះត្រូវបានចាត់ចូលក្នុងកំណត់ត្រាជារឿងប្រភេទ R-rated ឬភាពយន្តដែលតម្រូវឱ្យទស្សនិកជនត្រូវមានអាយុចាប់ពី ១៨ឆ្នាំ។ ភាពយន្តនេះជាប់ឈ្មោះដណ្ដើមពានរង្វាន់ចំនួន១១ប្រភេទក្នុងកម្មវិធីអូស្ការឆ្នាំ២០២០ ហើយឈ្នះពានរង្វាន់ចំនួន២ប្រភេទផងដែរ។
ថ្វីត្បិតតែប្រកាសផលិតរដូវកាលទីពីររបស់ខ្លួន ប៉ុន្តែក្រុមការងារមិនបានបង្ហើបឱ្យដឹងពីសាច់រឿងលម្អិតនៃវគ្គទីពីរនោះឡើយ ប៉ុន្តែទស្សនិកជនដែលជាអ្នកគាំទ្របានទស្សន៍ទាយថាវគ្គទីពីរនេះ ក្រុមផលិតប្រាកដជាបញ្ចូលតួអង្គ Harley Quinn គូស្នេហ៍របស់ Joker ចូលទៅក្នុងវគ្គទីពីរនេះ អាស្រ័យដោយឈ្មោះរបស់ភាពយន្តនេះគឺ «Joker: Folie à Deux»៕
