ក្រោយពីចោះទម្លុះរឿងក្បត់ចិត្ត ដល់ចែកផ្លូវគ្នាជាមួយនឹងតារាចម្រៀងប្រុសវ័យជ្រេ លោក ហេង ពិទូ កាលពីចុងឆ្នាំ ២០២១ កន្លងមកថ្មីៗនេះ ស្រាប់តែស្អាតស្រី ថៃ នារីសុជាតា ហៅកញ្ញា ហ្វីយ៉ាតា កាន់តែសម្ញែងភាពផ្អែម និងបើកបង្ហាញមុខម្ចាស់ស្នេហ៍ជាបុរសបរទេសមានរូបសង្ហាយ៉ាងជឿជាក់ជាងមុន។
តាមការបង្ហោះរូបភាពច្រើនសន្លឹកមិនសូវលោះពីមួយថ្ងៃទៅមួយថ្ងៃនៅលើបណ្ដាញសង្គមហ្វេសប៊ុក ឬអ៊ីនស្ដាក្រាមផ្ទាល់ខ្លួន ស្រីស្រស់សាច់សខ្ចី ហ្វីយ៉ាតា មិនលាក់ភ្នែកមហាជនទៀតឡើយ នាងបើកឱ្យឃើញរូបភាពថើបបបូរមាត់ដ៏ស្និតស្នាល ជាមួយសង្សារ និងមានរូបខ្លះបាច់ផ្កាក្រហមដ៏ធំពីសង្សារ ថែមក្លែមសម្តីជាសារបន្ថែមទៅលើរូបភាពដ៏ផ្អែមល្ហែមរបស់ខ្លួនផងដែរថា៖ «ប្រាកដណាស់មានអ្នកអបអរសាទរនិងស្នេហាយើង និងអ្នកដែលច្រណែនឈ្នានីសនិយាយមិនល្អពីយើង. ឱ្យតែពួកយើងពីរនាក់ចេះយល់ចិត្តគ្នា ធ្វើល្អដាក់គ្នានឹងផ្ដល់ក្ដីស្រលាញ់អោយគ្នាជារៀងរាល់ថ្ងៃ. ទោះអ្នកណានិយាយអីក៏លែងសំខាន់ដែរ»។
នៅពេលខាងស្រីមិនបន្ធូរដៃហើយ គេស្រាប់តែឃើញខាងប្រុសជាបុរសបរទេសរូបសង្ហាឈ្មោះ Kilian Strohl និងជាសង្សាហ្វីយ៉ាតាក៏លាន់សម្ដីដែរថា ៖ «កុំខាតពេលទៅរកអ្វីដែលល្អជាងនេះ តែត្រូវធ្វើខ្លួនឯងឱ្យក្លាយជាមនុស្សល្អសិន។ ព្រោះរឿងល្អបំផុតខ្លះ តែងតែកើតឡើងជាការភ្ញាក់ផ្អើលដោយពេលខ្លះយើងមិនបានត្រៀមទុកនៅថ្ងៃណាមួយ។ ប្រសិនបើអ្នករក្សាភាពស្មោះត្រង់, ចេះបន្ទាបខ្លួន និងមានទំនុកចិត្តគ្រប់គ្រាន់ជាមួយនិងខ្លួនអ្នកហើយល្អដាក់មនុស្សជុំវិញខ្លួន ក្ដីស្នេហាដ៏ល្អនឹងរកផ្លូវមករកអ្នកដោយខ្លួនឯង»។
យ៉ាងណាមិញ ជាការអបអរស្នេហារបស់ខ្លួន គេស្រាប់តែឃើញ ហ្វីយ៉ាតា និងសង្សារបរទេសដឹកដៃគ្នាថតឈុតកូនក្រមុំកូនកំឡោះ ទំនងដូចជាថត Pre-wedding មុនរៀបការ។ បើទោះបីជាផ្ដើមស្នេហ៍ថ្មីរយៈពេលខ្លីក៏ពិតមែន តែហ្វេនរបស់ ហ្វីយ៉ាតា ពិតណាស់ចង់ឃើញនាងមានសុភមង្គល ជួបស្នេហ៍ពិត និងឆាប់ចូលរោងការឆាប់ៗនេះ។
តម្រុយស្នេហារបស់ ហ្វីយ៉ាតា និងសង្សារបរទេស កាន់តែធ្វើឱ្យអ្នកគាំទ្រលើសជាតិស្ករ ប៉ុន្តែ ហ្វីយ៉ាតា នៅមិនទាន់សារភាពថា ខ្លួននឹងរៀបការជាលើកទី ២ ឬយ៉ាងណាទេ? ហ្វេននៅរងចាំស្ដាប់ដំណឹងល្អពី ហ្វីយ៉ាតា៕