តារាសម្ដែងលំដាប់ Top Grade របស់កូរ៉េដែលទើបតែចាប់ដៃគ្នារៀបអាពាហ៍ពិពាហ៍ថ្មោងថ្មីលោក Hyun Bin និង Son Ye Jin បានហោះទៅក្រេបចន្ទទឹកឃ្មុំនៅសហរដ្ឋអាមេរិក។ នៅពេលថ្មីៗនេះស្រាប់តែធ្លាយដំណឹងថា មានដំណឹងល្អហើយ Son Ye-jin កំពុងតាំងគភ៌។
ខាងក្រោមនេះជាសារដែល Son Ye Jin បានបង្ហោះចែករំលែកដំណឹងល្អនៅលើបណ្ដាញសង្គម៖«សួស្ដីអ្នកទាំងអស់គ្នា! សុខសប្បាយជាទេ? ចំណែកខ្ញុំសុខជាធម្មតាទេ។ថ្ងៃនេះខ្ញុំមានដំណឹងល្អចង់ចែករំលែកជាមួយអ្នកទាំងអស់គ្នាដោយក្ដីរីករាយ។ពួកយើង (Son Ye Jin-Hyun Bin) កំពុងតែមានជីវិតថ្មីមួយទៀតឆាប់ៗនេះ។ខ្ញុំមានអារម្មណ៍សឹងតែមិនចង់ជឿ ប៉ុន្តែខ្ញុំចាប់ផ្ដើមរស់នៅដោយប្រុងប្រយ័ត្នហើយដឹងពីការប្រែប្រួលនៅក្នុងរាងកាយរបស់ខ្ញុំ អមទៅដោយភាពរីករាយ»។
តារាស្រីរូបនេះបានបន្តទៀតថា «ខ្ញុំពិតជាអរគុណណាស់ ប៉ុន្តែខ្ញុំមិនទាន់បានប្រាប់អ្នកគ្រប់គ្នាកន្លងមកដោយសារតែខ្ញុំចង់បញ្ជាក់ឱ្យច្បាស់លាស់សិន។ សម្រាប់អ្នកគាំទ្រដែលរង់ចាំស្ដាប់ដំណឹងល្អនេះដូចជាពួកខ្ញុំ ខ្ញុំសូមប្រាប់ដំណឹងនេះដល់អ្នកគ្រប់គ្នាឱ្យបានដឹងមុននឹងហួសពេលពួកខ្ញុំនឹងការពារជីវិតដ៏មានតម្លៃដែលចូលមកក្នុងជីវិតពួកខ្ញុំនេះ។ខ្ញុំសង្ឃឹមថាអ្នកទាំងអស់គ្នានឹងមើលថែវត្ថុមានតម្លៃដែលចូលមកក្នុងជីវិតអ្នកទាំងអស់គ្នាហើយមានសុខភាពល្អសូមឱ្យអ្នកគ្រប់គ្នារីករាយ»។
