ចំណាប់អារម្មណ៍ខ្សែការពារ អ៊ុក សុវណ្ណ ជុំវិញការប្រកួតបញ្ចប់ពូល G នៃពានរង្វាន់ AFC Cup 2022 បានលើកឡើងដូច្នេះថា៖«សម្រាប់ខ្ញុំ ការប្រកួតជាមួយក្រុមម៉ាឡេស៊ី Kedah Darul Aman FC គឺជាការប្រកួតមួយដ៏អស្ចារ្យ»។
សុវណ្ណ បន្ត៖«ពួកយើងបានត្រៀមខ្លួនរួចរាល់ ហើយពួកយើងក៏នៅតែត្រូវការជ័យជម្នះ ដើម្បីឡើងទៅជុំបន្ទាប់ផងដែរ។ ជារួមទាំងកីឡាករ និងក្រុមការងារគ្រូ គឺពួកយើងរៀបចំរួចរាល់ សម្រាប់ការប្រកួតយប់នេះ ហើយពួកយើងនឹងព្យាយាមធ្វើឲ្យបានល្អ ក្នុងការប្រកួតដ៏សំខាន់នេះ»។
ស្ថិតនៅលេខ១ក្នុងពូល G តែក្លិបបាល់ទាត់វិសាខា មិនទាន់អាចធានាពីកៅអីទៅវគ្គបន្ទាប់នៅឡើយទេ ដ្បិតពេលនេះ Kedah Darul Aman FC និង Bali United FC ត្រូវការពិន្ទុជាចាំបាច់។ ហេតុនេះ វិសាខាត្រូវការឈ្នះ ឬស្មើជាមួយ Kedah ដើម្បីអាចឆ្លងទៅវគ្គបន្តដោយជោគជ័យ។
សម្រាប់ប្រកួតបិទពូល G របស់វិសាខា នឹងធ្វើឡើងនៅថ្ងៃព្រហស្បត្តិ៍ ទី៣០ ខែមិថុនា ឆ្នាំ២០២២ លើទីលានកីឡដ្ឋាន Kapten I Wayan Dipta ដោយប៉ះក្រុម Kedah Darul Aman របស់ម៉ាឡេស៊ី វេលាម៉ោង ៨:០០យប់ (ម៉ោងនៅកម្ពុជា)៕
