នាង Harmony Tan ដែលជាកូនខ្មែរកើតនៅប្រទេសបារាំង ត្រូវការឈ្នះប្រកួតចុងក្រោយនេះ ដើម្បីកក់កៅអីឡើងទៅវគ្គ៨នាក់ចុងក្រោយ (១/៤) ក្នុងព្រឹត្តិការណ៍កីឡាវាយកូនបាល់អន្តរជាតិ 2022 Wimbledon Championships វិញ្ញាសានារីឯកត្តជន នៅទីលាន All England Lawn Tennis and Croquet Club ក្នុងទីក្រុងឡុងដុង ប្រទេសអង់គ្លេស។
កីឡាការិនីវ័យ២៤ឆ្នាំរូបនេះត្រូវប្រកួតចុងក្រោយនៅក្នុង Section 4 ជាមួយកីឡាការិនីអាមេរិកលេខ២០ពិភពលោក នាង Amanda Anisimova។ អ្នកឈ្នះក្នុងប្រកួតនេះនឹងតំណាងឱ្យ Section 4 ឡើងទៅវគ្គ៨នាក់ចុងក្រោយ។ អ្នកឡើងដល់វគ្គចុងក្រោយតាម Section នីមួយៗនឹងទទួលបានថវិកា
លើកទឹកចិត្ត១៩ម៉ឺនផោន (ជាង២២ម៉ឺនដុល្លារអាមេរិក) ចំណែកអ្នកបន្តកៅអីដល់វគ្គ៨នាក់ចុងក្រោយ នឹងទទួលបានថវិកាលើកទឹកចិត្ត៣១ម៉ឺនផោន (ជាង៣៧ម៉ឺនដុល្លារ) ហើយអ្នកឈ្នះជើងឯក នឹងទទួលបាន២លានផោន (ជាង២លាន៤សែនដុល្លារ)។
អត្ថបទពាក់ព័ន្ធ៖Novak Djokovic ឈ្នះAustralian Open, French Open,Wimbledon ក្នុងឆ្នាំតែមួយ
មិនមានឯកសារជាច្រើនបញ្ជាក់ពីជីវិតឯកជនរបស់គ្រួសារ Harmony Tan ច្រើននោះទេ ប៉ុន្តែបើតាមtennismajors លើកឡើងថានាងជាកូនខ្មែរ-វៀតណាម ដែលកើតនៅក្នុងទីក្រុងប៉ារីស ប្រទេសបារាំង។ នាងបានសម្រេចតាមបំណងរបស់ឪពុកម្ដាយខ្លួនដោយបានបញ្ចប់ការសិក្សាថ្នាក់បរិញ្ញាប័ត្រ ហើយក្រោយមកទៀតបានបញ្ចប់ការសិក្សា Sciences Po Paris ដែលសំដៅលើកម្មវិធីសិក្សាកម្រិតខ្ពស់របស់អត្តពលិក។
បច្ចុប្បន្នរូបគេឈរលេខ៩០ពិភពលោកសម្រាប់វិញ្ញាសាឯកត្តជន ហើយឈរលេខ៣០២ពិភពលោក ក្នុងវិញ្ញាសាវាយគូនារី។ នាងធ្លាប់ចូលរួមការប្រកួត Grand Slam ធំៗទាំង៤លើលោករួចរាល់ហើយទាំង Australian Open, French Open, Wimbledon និង US Open។
មុនឡើងដល់វគ្គចុងក្រោយនៃ Section 4 កីឡាការិនី Harmony Tan បានយកឈ្នះម្ចាស់ជើងឯក Wimbledon ៧សម័យកាល Serena Williams នៅវគ្គជម្រុះជុំទី១ ដោយលទ្ធផល ៧-៥,៦-១,៧-៦ ហើយនៅជុំទី២ បានបន្តយកឈ្នះកីឡាការិនីអេស្ប៉ាញលេខ៣២ពិភពលោក S Sorribes Tormo ៦-៣,៦-៤ ហើយជុំទី៣ បានយកឈ្នះកីឡាការិនីម្ចាស់ផ្ទះអង់គ្លេស Katie Boulter ដោយលទ្ធផល ៦-១,៦-១។
កំណត់ត្រាឆ្នាំចាស់របស់ Harmony Tan គឺធ្លាក់ត្រឹមវគ្គជម្រុះលើកទី១៥ ជុំទី២ ខណៈនាង Amanda Anisimova ដែលជាគូប្រជែងបានធ្លាក់ចេញត្រឹមវគ្គជម្រុះជុំទី១ នៃ Section 3។
នៅឆ្នាំ២០២២ នេះវិញ្ញាសាឯកត្តជននារីនៃព្រឹត្តិការណ៍ Wimbledon មានចំនួន ៨ Section ហើយក្នុង ១ Section មានកីឡាការិនី១៦នាក់ប្រកួតជម្រុះ។ អ្នកឈ្នះតាម Section នីមួយៗមានឈ្មោះឡើងទៅ៨នាក់ចុងក្រោយ។
គិតត្រឹមពេលនេះរកឃើញកីឡាការិនី៤នាក់ ឡើងទៅចាំនៅវគ្គ៨នាក់ចុងក្រោយហើយ ដោយក្នុងនោះ៖
-Marie Bouzková (ឆេក) ប៉ះ Ons Jabeur (ទុយនេស៊ី)
-Tatjana Maria (អាល្លឺម៉ង់) ប៉ះ Jule Niemeier (អាល្លឺម៉ង់)
ចំណែក Section ពី១ ដល់៤ មិនទាន់បញ្ចប់ការប្រកួតរបស់ខ្លួននៅឡើយទេ។
