សមាជិកអាជ្ញាកណ្ដាលកម្រិត FIFA ប្រចាំព្រះរាជាណាចក្រកម្ពុជា គឺ កញ្ញា ប្លុង ពេជ្រអក្ខរ៉ា បានបង្ហាញខ្លួនក្នុងវគ្គផ្ដាច់ព្រ័ត្រពានរង្វាន់បាល់ទាត់នារីធំជាងគេប្រចាំតំបន់អាស៊ាន AFF Woman Championship 2022 ដែលហ្វីលីពីន ជាម្ចាស់ផ្ទះ។ នេះជាការអាជ្ញាកណ្តាលរបស់កម្ពុជា ដំបូងគេដែលបង្ហាញខ្លួននៅវគ្គផ្ដាច់ព្រ័ត្រ គិតចាប់តាំងពីពានរង្វាន់នេះបង្កើតឡើងដំបូងពីឆ្នាំ២០០៤ មក។
វគ្គផ្ដាច់ព្រ័ត្រឆ្នាំ២០២២ នេះជាជំនួបរវាងក្រុមម្ចាស់ផ្ទះហ្វីលីពីន ប៉ះជាមួយក្រុមថៃ លើទីលានកីឡដ្ឋាន Rizal Memorial Stadium ក្នុងទីក្រុងម៉ានីល នាល្ងាចថ្ងៃអាទិត្យ ទី១៧ ខែកក្កដា ឆ្នាំ២០២២ ក្រោមក្រសែភ្នែកទស្សនិកជនទស្សនាផ្ទាល់ជាង៨ពាន់នាក់។
អត្ថបទពាក់ព័ន្ធ៖បញ្ជីឈ្មោះអាជ្ញាកណ្ដាល FIFA ទាំង១១រូបរបស់កម្ពុជា ប្រចាំឆ្នាំ២០២២ នេះ
ជំនួបនេះដែរមានអាជ្ញាកណ្ដាលកាន់កញ្ចែលើទីលានគឺBùi Thị Thu Trang ជាជនជាតិវៀតណាម ហើយជំនួយការអាជ្ញាកណ្ដាលទី១ Ha Thi Phuong ជនជាតិវៀតណាម Nur Akamal Binti Anuar ជនជាតិម៉ាឡេស៊ីនិង ប្លុង ពេជ្រអក្ខរ៉ា ជនជាតិខ្មែរជាមន្រ្តីទី៤។ នេះជាការបង្ហាញខ្លួនលើកដំបូងសម្រាប់អាជ្ញាកណ្ដាលនារីកម្ពុជា នៅក្នុងព្រឹត្តិការណ៍នេះហើយក៏ជាលើកដំបូងដែលឡើងដល់វគ្គផ្ដាច់ព្រ័ត្រដែរ។
សហព័ន្ធកីឡាបាល់ទាត់កម្ពុជា បានបញ្ជូនអាជ្ញាកណ្ដាលនារីចំនួន២រូប ទៅដឹកនាំការប្រកួតក្នុងពានរង្វាន់ AFF Woman Championship 2022 នេះនៅហ្វីលីពីន ដោយមានកញ្ញា ប្លុង ពេជ្រអក្ខរ៉ា និងកញ្ញា ថោ ដាវី។ អ្នកទាំង២ ធ្លាប់បានដឹកនាំការប្រកួតកន្លងមកតាំងពីនៅវគ្គជម្រុះតាមពូលមកម៉្លេះ រហូតដល់វគ្គផ្ដាច់ព្រ័ត្រ ទើប ប្លុង ពេជ្រអក្ខរ៉ា បង្ហាញខ្លួនចុងក្រោយ៕
