ខណៈដែលតារាសម្ដែង-តារាចម្រៀងកូរ៉េល្បីៗមួយចំនួនកើតមកលើគំនរមាសគំនរប្រាក់ ប៉ុន្តែក៏មានតារាផ្សេងទៀតដែរដែលកើតក្នុងគ្រួសារក្រីក្រឬមានជីវភាពមធ្យម។ ក្នុងនោះមានតារាខ្លះថែមទាំងរកប្រាក់ជួយដោះបំណុលគ្រួសារ ខណៈដែលតារាខ្លះទៀតពេលរកចំណូលបានច្រើនហ៊ានចំណាយប្រាក់ច្រើនសន្ធឹកសន្ធាប់ដើម្បីផ្ដល់ក្ដីសុខជូនលោកឪពុកអ្នកម្ដាយវិញ។
១.Hyreri សមាជិក Girl’s Day
បច្ចុប្បន្នតារាចម្រៀងដែលបានវិវត្តន៍ទៅជាតារាសម្ដែងផងនោះ ក្រោយពីជោគជ័យយ៉ាងត្រចះត្រចង់តាមរយៈតួអង្គក្នុងខ្សែភាពយន្តភាគ Reply 1988 នៅឆ្នាំ២០២១ ដែលទើបតែកន្លងទៅ កញ្ញាទទួលបានតំណែងជាតួឯកស្រីពីររឿងបន្ថែមទៀតគឺរឿង «My Roommate is A Gumiho» និងរឿង «When Flowers Bloom,I Think of the Moon»។ Hyeri ចាប់ផ្ដើមប្រឡូកសិល្បៈដំបូងកាលពីឆ្នាំ២០១០ ដោយកាលណោះកញ្ញាមានអាយុត្រឹម១៦ឆ្នាំប៉ុណ្ណោះ។ ៤ឆ្នាំលោតលេងក្នុងពិភពសិល្បៈត្រឹមឆ្នាំ២០១៤ កញ្ញាបានកសាងស្នាដៃបានយ៉ាងគាប់ប្រសើរ បើយោងតាមសារព័ត៌មាន Koreaboo Hyeri បានទិញ Apartment នៅតំបន់ Jamsil ក្រុងសេអ៊ូលដើម្បីឱ្យគ្រួសាររស់នៅបានស្រួល ថែមទាំងទិញរថយន្តទំនើបនាំចូលពីបរទេសជូនលោកឪពុកថែមទៀតផង។
២.Jung Eun-ji សមាជិក Apink
តារាចម្រៀងដែលអ្នកគាំទ្រនិងមហាជនស្គាល់ថា Eunji ធ្លាប់បានផ្ដល់សម្ភាសដល់ទស្សនាវដ្ដីម៉ូដ Grazia ថាគ្រួសារកញ្ញាមានបញ្ហាហិរញ្ញវត្ថុ ដូច្នេះហើយកញ្ញាគិតថាពេលណាកញ្ញារកប្រាក់បាន កញ្ញានឹងដោះបំណុលឱ្យគ្រួសារ ដើម្បីឱ្យសមាជិកគ្រួសាររស់នៅដោយគ្មានការកង្វល់។ កញ្ញានិយាយថាកញ្ញាស្ទើតែមិនជឿទាល់តែសោះថាទីបំផុតកញ្ញាអាចដោះបំណុលបានទាំងដើមនិងទាំងការប្រាក់។ Eun Ji បាននាំម្ដាយត្រលប់ទៅដើរកម្សាន្តនៅកោះជេជូជាកន្លែងដែលគាត់ធ្លាប់ទៅ Honeymoon ហើយថែមទាំងរៀបចំអាហារយ៉ាងឆ្ងាញ់សម្រាប់អ្នកម្ដាយផងដែរ ក្រោយពីញ៉ាំអាហាររួចកញ្ញាបានហុចសៀវភៅធនាគារឱ្យម្ដាយ ពេលនោះអ្នកម្ដាយរបស់កញ្ញាយំយ៉ាងខ្លាំង។ ក្រោយមកអ្នកទាំងពីរឱបគ្នាហើយយំជាមួយគ្នា។
៣. IU
តារាចម្រៀង IU បានធំធាត់ឡើងជាមួយនឹងជីដូនរបស់ខ្លួន ដោយសារតែលោកឪពុកអ្នកម្ដាយត្រូវប្រឹងប្រែងរកប្រាក់ចិញ្ចឹមគ្រួសារ។ យោងតាមសារព័ត៌មាន Koreaboo បានផ្សាយឱ្យដឹងថាពីតូច IU និងគ្រួសាររស់នៅក្នុងផ្ទះក្រោមដី ដែលសំបូរទៅដោយកន្លាត។ ស្ថានភាពគ្រួសារកញ្ញាយ៉ាប់យ៉ឺនដូច្នេះក៏ដោយសារតែម្ដាយរបស់កញ្ញារងគ្រោះព្រោះជួយធានាខ្ចីប្រាក់ឱ្យគេប៉ុន្តែកូនបំណុលនោះបែរជារត់បាត់ធ្វើឱ្យកញ្ញាក្លាយជាអ្នករ៉ាប់រងបំណុលជំនួស។នៅឆ្នាំ២០១១ IU បានប្រកាសក្នុងកម្មវិធីទូរទស្សន៍មួយថាកញ្ញាបានដោះបំណុលជូនលោកឪពុកអ្នកម្ដាយបានសម្រចហើយ ក្រោយអាល់ប៊ុមចម្រៀង good day របស់កញ្ញាដែលចេញកាលពីឆ្នាំ២០១០ ទទួលបានជោគជ័យខ្លាំង។ បន្ទាប់ពីវិបត្តិនៃបំណុលគ្រួសារត្រូវបានដោះស្រាយ សាធារណជនបានផ្ដោតការចាប់អារម្មណ៍ចំពោះកញ្ញាតែទៅលើសមិទ្ធិការងារចម្រៀងនិងសម្ដែង ជាពិសេសរឿងភាគបែបអភិនិហារ Hotel Del Luna ក៏ដូចជាភាពយន្តខ្នាតធំ Broker ដែលទើបតែដាក់បញ្ចាំងនៅតាមរោងភាពយន្តនានាក្នុងឆ្នាំ២០២២នេះ។
៤. Jo Kwon សមាជិក 2AM
ទោះជា Jo Kwon គឺជាតារាចម្រៀង ប៉ុន្តែតារារូបនេះបានប្រឹងប្រែងថតកម្មវិធីតាមបណ្ដាស្ថានីយទូរទស្សន៍ ហើយដោយសារគេជាមនុស្សមានសមត្ថភាពនិងពូកែកំប្លែងផងនោះទើបធ្វើឱ្យទទួលបានឱកាសជាតារាកិត្តិយសក្នុងកម្មវិធីនានា។ យោងតាមសារព័ត៌មាន Kpopstarz បានឱ្យដឹងថាថ្វីត្បិតតែតារារូបនេះបង្ហាញវត្តមានជាតារាកិត្តិយសនាំតែភាពរីករាយនិងស្នាមញញឹមសម្រាប់អ្នកទស្សនាប៉ុន្តែជីវិតពិតរបស់គេមិនបានសុខស្រួលឬក៏រីករាយនោះឡើយ ព្រោះគ្រួសាររបស់ Jo Kwon ជំពាក់បំណុលគេ។ យ៉ាងណាមិញជាមួយនឹងការតស៊ូព្យាយាមទីបំផុតសមាជិក 2 AM រូបនេះអាចដោះបំណុលគ្រួសារបាន មិនតែប៉ុណ្ណោះថែមទាំងអាចទិញផ្ទះជូនអ្នកម្ដាយឱ្យបានរស់នៅសុខស្រួលថែមទៀតផង។
៥.Zico សមាជិក Block B
Zico ចាប់ផ្ដើមប្រឡូកសិល្បៈដំបូងជា Rapper ក្រោយមកបានចូលរួមជាសមាជិក Block B។ ក្រោយមក Zico បានក្លាយជាតារាចម្រៀងទោល ព្រមទាំងកាន់តួនាទីជា Producer ផង និងជា Rapper ផង។ Zico ថែមទាំងបើកផលិតកម្មផ្ទាល់ខ្លួនមានឈ្មោះ KOZ Entertainment ផងដែរ។ យោងតាមសារព័ត៌មាន Koreaboo បានផ្សាយថា Zico បានយកប្រាក់ចំណូលរាប់ពាន់លានវ៉ុនដំបូងដែលលោករកបានទៅដោះបំណុលគ្រួសារ។ សាមីខ្លួនលើកឡើងថាលោកមិនមានអារម្មណ៍ថានេះគឺជាសម្ពាធឡើយប៉ុន្តែលោកបែរជាយល់ថានោះគឺជាកាតព្វកិច្ចដែលកូនមានចំពោះឪពុកម្ដាយ ម្យ៉ាងទៀតដើម្បីជាការអរគុណដែលគ្រួសារមិនបានបង្ខំឱ្យខ្លួនធ្វើអ្វីដែលខ្លួនមិនចង់ ទោះជាស្ថានភាពគ្រួសារជួបផលលំបាកយ៉ាងណាក្ដី។
តារាទាំងអស់ខាងលើត្រូវមហាជនប្រសិទ្ធិនាមឱ្យថាជាកូនកត្តញ្ញូព្រោះអ្នកទាំងនោះមិនបានខ្វល់ពីសេចក្ដីសុខផ្ទាល់ខ្លួនប៉ុន្តែគិតគូរដល់គ្រួសារមុនជានិច្ច៕