បន្ទាប់ពីដឹងដំណឹងអតីតភរិយាប្រកាសថាកូនស្រីចិញ្ចឹមជនជាតិអេត្យូពី ត្រូវបានសកលវិទ្យាល័យ Spelman ទទួលឱ្យចូលសិក្សាកាលពីថ្ងៃទី០១ ខែសីហា កន្លងទៅនោះ Brad Pitt បានចេញមកផ្ដល់សម្ភាសន៍ថា «លោករំភើបរហូតហូរទឹកភ្នែក»។
កាលពីថ្ងៃទី៣ ខែសីហា Brad Pitt បាននិយាយក្នុងបទសម្ភាសន៍មួយខណៈលោកកំពុងតែប្រូម៉ូតផ្សព្វផ្សាយភាពយន្តថ្មីរបស់លោក «Bullet Train» ថាលោកពិតជារំភើបដែលទទួលបានដំណឹងថាកូនស្រីបានសិក្សានៅក្នុងសកលវិទ្យាល័យល្បី ពិសេសលោករីករាយដែលកូនស្រីបានបំពេញអ្វីដែលនាងស្រលាញ់។ «ខ្ញុំពិតជាមានមោទកភាពណាស់សម្រាប់កូនស្រីរបស់ខ្ញុំ។ នាងគឺជាមនុស្សដែលឆ្លាតបំផុត។ Zahara ប្រាកដជាធ្វើបានល្អបំផុតនៅក្នុងសកលវិទ្យាល័យដែលនាងរៀន។ នេះគឺជារឿងល្អដែលកូនៗអាចរកឃើញផ្លូវ ចំណូលចិត្ត និងគោលដៅរបស់ពួកគេ។ ពេលវេលាដើរលឿនណាស់។ កូនស្រីឆាប់ធំមែន។ ខ្ញុំរំភើបរហូតស្រក់ទឹកភ្នែក»។
Zahara គឺជាកូនស្រីចិញ្ចឹមដែលអតីតមគូស្នេហ៍កម្រិតពិភពលោក Angelina Jolie និង Brad Pitt ទទួលយកមកចិញ្ចឹមបីបាច់ជាកូនទៅតាមផ្លូវច្បាប់។ Zahara ត្រូវអ្នកទាំងពីរយកមកចិញ្ចឹមនៅឆ្នាំ២០០៥ ក្នុងវ័យ៦ឆ្នាំ។ នាងគឺជាក្មេងកំព្រាជនជាតិអេត្យូពី ដែលឪពុកម្ដាយមានផ្ទុកមេរោគអេដស៍បានបោះបង់ចោល។ Zahara មានចំណូលចិត្តធ្វើជាអ្នករចនាម៉ូដគ្រឿងអលង្ការ នាងតែងតែចូលរួមក្នុងកិច្ចការងារមនុស្សធម៌ តាមរយៈការលើកទឹកចិត្តពីម្ដាយរបស់នាងគឺអ្នកស្រី Angelina Jolie៕
ប្រភព៖ Hollywood Reporter