ជំនួបសប្តាហ៍ទី១៥ រវាងក្លិបបាល់ទាត់ អង្គរថាយហ្គឺរ ទល់នឹង វិសាខា នៅថ្ងៃសៅរ៍ ទី១៣ ខែសីហា ឆ្នាំ២០២២ នេះនឹងប្រកួតដោយមិនអនុញ្ញាតឲ្យមានទស្សនិកជនចូលរួមទស្សនាប្រកួតផ្ទាល់ឡើយនៅកីឡដ្ឋានហនុមាន។
មូលហេតុដូចដែលអ្នកទាំងអស់គ្នាបានដឹងហើយថានៅក្នុងការប្រកួតមុននៅកីឡដ្ឋានហនុមាន មានអ្នកគាំទ្របានគប់ដកទឹកសុទ្ធចូលទៅក្នុងទីលានប្រកួត។ ដោយសារតែបញ្ហានេះ សហព័ន្ធកីឡាបាល់ទាត់កម្ពុជា បានចេញសេចក្តីសម្រេចមួយ ដែលនាំឲ្យក្លិបបាល់ទាត់អង្គរថាយហ្គឺរទទួលពិន័យមិនឲ្យអ្នកគាំទ្រចូលទស្សនាផ្ទាល់។
ខណ:លោក AKIHIRO KATO ប្រធានក្លិបបាល់ទាត់អង្គរថាយហ្គឺរក៏បានមានការសោកស្តាយ និងសូមអភ័យទោស ចំពោះការកើតឡើងនូវបញ្ហាខាងលើនេះ។
លោកបន្តទៀតថា៖«ខ្ញុំពិតជាសប្បាយចិត្ត និងដឹងគុណជាខ្លាំងណាស់ ចំពោះសេចក្តីស្រលាញ់ និងទឹកចិត្តអ្នកគាំទ្រចំពោះក្លិប កាន់តែកើនឡើងពីមួយឆ្នាំទៅមួយឆ្នាំ»។
ក្លិបបាល់ទាត់អង្គរថាយហ្គឺរក៏ដូចជាវិស័យបាល់ទាត់កម្ពុជានិង លីគកំពូលកំពុងតែដើរទៅមុខ ក្នុងនោះក៏មានបញ្ហាជាច្រើនកើតមានឡើងផងដែរ។ ប៉ុន្តែយើងនឹងអនុវត្តតាមច្បាប់ និងគោរពវិន័យ ចូលរួមដោះស្រាយបញ្ហាជាមួយគ្នា ដើម្បីការអភិវឌ្ឍទៅមុខកាន់តែប្រសើរ។ ខ្ញុំតែងតែមានភាពរីករាយនិង អរគុណចំពោះការស្រលាញ់របស់អ្នកទាំងអស់គ្នា។
ពីលោកប្រធានក្លិបអង្គរថាយហ្គឺរ : AKIHIRO KATO
កន្លងទៅក្លិបបាល់ទាត់ Tiffy Army FC ក៏ធ្លាប់ត្រូវបាន CPL ពិន័យជាទឹកប្រាក់ និងហាមមិនឱ្យអ្នកគាំទ្រចូលរួមទស្សនាផ្ទាល់ការប្រកួតលើទឹកដីកីឡដ្ឋាន ខ.ភ.ម ចំនួន១ប្រកួតផងដែរ កាលពីថ្ងៃទី៩ ខែមេសា ឆ្នាំ២០២២ ក្នុងសប្ដាហ៍ទី៦ ក្រោយគ្រប់គ្រងអ្នកគាំទ្រខ្លួនមិនបាន ដែលធ្វើឱ្យប៉ះពាល់ដល់មន្រ្តីរៀបចំការប្រកួត។
