ខ្សែបម្រើការពារសញ្ជាតិប្រេស៊ីល Casemiro យល់ព្រមចាកចេញពីក្លិបអធិរាជស Real Madrid ផ្លាស់ទៅកាន់ក្លិបបិសាចក្រហម Man United ក្នុងតម្លៃ ៦០លានអឺរ៉ូ បូករួមទាំងប្រាក់បន្ថែមចំនួន ១០លានអឺរ៉ូ ជាមួយកិច្ចសន្យារយៈពេល ៤ឆ្នាំនៅ Old Trafford។
បច្ចុប្បន្នកីឡាករសញ្ជាតិប្រេស៊ីលរូបនេះបាននិយាយលាមិត្តរួមក្រុមទាំងអស់នៅទីក្រុង Madrid រួចហើយ ខណៈដែល Casemiro នឹងហោះហើរទៅកាន់ប្រទេសអង់គ្លេស និងបំពេញការធ្វើតេស្តសុខភាពនៅចុងសប្តាហ៍នេះ។
លោក Ancelotti គ្រូបង្ខឹក Real Madrid បានថ្លែងថា៖«ខ្ញុំបាននិយាយជាមួយនឹង Casemiro រួចរាល់, គេថាគេចង់សាកល្បងការប្រកួតប្រជែងថ្មី។ យើងយល់ពីការសម្រេចចិត្តរបស់គាត់»។
កីឡាករវ័យ ៣០ឆ្នាំរូបនេះ បានឈ្នះអ្វីៗគ្រប់យ៉ាងជាមួយក្លិបយក្សអេស្ប៉ាញ Real Madrid រាប់ចាប់តាំងពីពានរង្វាន់ក្នុងស្រុក La Liga ៣លើក ពានរង្វាន់កំពូលអឺរ៉ុប UCL ៥លើក។ខណ: Casemiro នឹងក្លាយជាកីឡាករថ្មីរបស់ Man Utd បន្ទាប់ពីការមកដល់របស់ Christian Eriksen, Tyrell Malacia និង Lisandro Martinez៕