ក្រោយ​ផ្ទុះ​ព័ត៌មាន​ភ្ញាក់ផ្អើល​រឿង​បែកបាក់​គ្នា​រហូត​ឈាន​ដល់​ការ​បែក​ផ្ទះ​​រវាង​កំពូល​តារា​ឯក​ស្រី​ដ៏​ល្បី​របស់​កូរ៉េ​ Jun Ji hyun ​ខណៈ​ស្វាមី​ស្នើ​សុំ​លែងលះ​ព្រោះ​មាន​ស្រី​ថ្មី ពេល​នេះ​ទាំង​ផលិតកម្ម​គ្រប់គ្រង​តារា​ស្រី​រូប​នេះ​ទាំង​សាមី​ខ្លួន​សា្វមី​​បាន​ចេញ​មក​ធ្វើ​ការ​បដិសេធ​ព័ត៌មាន​ចចាមអារ៉ាម​ខាង​លើ​ហើយ​។

​ស្វាមី​វ័យ​៤០​ឆ្នាំ​ដែល​ជា​ប្រធាន​ក្រុម​ហ៊ុន​ Alpha របស់​តួឯក​ស្រី​ «សង្សារ​ខ្ញុំ​ជា​បុរស​ភព​ផ្កាយ​» បាន​ធ្វើ​រឿង​មួយ​ដែល​នាំ​មហាជន​មាន​ការ​ចាប់​អារម្មណ៍​យ៉ាង​ខ្លាំង​ ជា​ពិសេស​វិធីសាស្ត្រ​ឆ្លើយតប​នឹង​ព័ត៌មាន​ចចាមអារ៉ាម​របស់​ពិត​ជា​ប្លែក​ គួរ​ឱ្យ​អស់​សំណើច​តែ​ច្បាស់លាស់​គួរ​ទទួល​យក​បាន​។​

Choi Joon Hyuk ស្វាមី​របស់​តារា​ល្បី​រូប​នេះ​រមែង​តែងតែ​ប្ដូរ​រូប​ Profile នៅ​រាល់​ពេល​ដែល​មាន​ព័ត៌មាន​ចចាមអារ៉ាម​រឿង​លែងលះ​គ្នា​រវាង​អ្នក​ទាំង​ពីរ​ខ្ចរខ្ចាយ​ជា​សាធារណៈ ដោយ​ម្ដង​នេះ​លោក​បាន​ប្ដូរ​រូប​ Profile នៅ​ក្នុង​ Kakao Talk ជា​រូប​ Cartoon ល្បី​ឈ្មោះ​ SlamDunk ​ព្រម​ជាមួយ​នឹង​ពាក្យ​សន្ទនា​ដែល​តួ​តុក្កតា​នោះ​បាន​និយាយ​ថា​៖ «ខ្ញុំ​…​ចង់​ក្លាយ​ជា​ស្វាមី​របស់​ Jun Ji Hyun!»

មហាជន​បាន​ឃើញ​ហើយ​ក៏​យល់​ឃើញ​ថា​លោក​ Choi ប្រើ​វិធី​សាមញ្ញ​បែប​កំប្លែង​ដើម្បី​ឆ្លយ​តប​នឹង​ដំណឹង​លែងលះ​ ក្រោយ​មាន​ YouTuber ល្បី​ឈ្មោះ​ Kim Yong Oh ដែល​ជា​អ្នក​ព័ត៌មាន​របស់​ Garo Sero Institute ជា​សារព័ត៌មាន​លើ​ YouTube បាន​ចេញ​មក​ប្រកាស​ព័ត៌មាន​ថា​ «ស្វាមី​របស់​ Jun Ji Hyun បាន​ចាក​ចេញ​ពី​ផ្ទះ​ទៅ​នៅ​កន្លែង​ផ្សេង​ ក្រោយ​ពី​លោក​បាន​ប្រាប់​ទៅ​ Ji Hyun ថា​លោក​មិន​ចង់​ធ្វើ​ជា​ស្វាមី​របស់​នាង​ជា​បន្ត​ទៀត​នោះ​ទេ​»។

ក្រោយ​មាន​ដំណឹង​អកុសល​នេះ​ផ្សព្វផ្សាយ​ចេញ​ជា​សាធារណៈ​ផលិតកម្ម​ Culture Depot ដែល​គ្រប់គ្រង​លើ​តារា​ស្រី​ Jun Ji Hyun បាន​ចេញ​មក​បដិសេធ​ព័ត៌មាន​នេះ​តាំង​ពី​ថ្ងៃ​ទី ​៣​ ខែ​មិថុនា​ ដោយ​ប្រកាស​ថា​នឹង​ធ្វើ​ការ​ប្ដឹង​ចំពោះ​អ្នក​ដែល​ផ្សព្វផ្សាយ​ព័ត៌មាន​ក្លែងក្លាយ​នេះ​ រួម​ទាំង​អ្នក​លេង​អ៊ិនធឺណិត​ដែល​បង្កើត​ព័ត៌មាន​ក្លែងក្លាយ​នេះ​ឡើង​ផង​ដែរ​៕