កញ្ញា Hinano Kurosaki ស្រីស្អាតមួយរូបដែលជា Influencer ល្បីឈ្មោះនៅទីក្រុងតូក្យូប្រទេសជប៉ុន បានបង្ហាញវត្តមានយ៉ាងភ្ញាក់ផ្អើលនៅក្នុងកម្មវិធីប្រកាសថតខ្សែភាពយន្តថ្មីដែលមានចំណងជើងថា KTV : Killing Time Violently ក្រោមស្នាដៃអ្នកដឹកនាំរឿងល្បីឈ្មោះ Jimmy Henderson ដែលធ្លាប់ល្បីល្បាញពីរឿង JAILBREAK និង The Prey។
កញ្ញា Hinano Kurosaki គឺជា Influencer ល្បីម្នាក់ដែលតែងបង្ហាញមហាជនអ្នកគាំទ្រពីរបៀបជ្រើសរើសគ្រឿងអលង្ការស្អាតឱ្យសមរាងកាយ រួមទាំងការហាត់ប្រាណថែរក្សាសុខភាពឱ្យមានរាងស្អាតផងដែរ។ តារាជប៉ុនល្បីឈ្មោះរូបនេះ ត្រូវបានមហាជនជាច្រើនចោលក្រសែភ្នែកចាប់អារម្មណ៍ខ្លាំងជាងគេនៅក្នុងប្រកាសភាពយន្តនេះ ដោយសារតែកញ្ញាមានរូបសម្រស់ស្រស់ស្អាត និងស្នាមញញឹមរាក់ទាក់មកកាន់អ្នកជុំវិញខ្លួន។ តាមការបង្ហើបគឺកញ្ញាមានវ័យចូលក្បាល ៤០ ហើយ ក៏ប៉ុន្តែបើមើលទៅសម្រស់វិញគឺមិនស៊ីនឹងវ័យសោះឡើយ។
កញ្ញា Hinano Kurosaki បានប្រាប់ឱ្យដឹងថា មូលហេតុដែលកញ្ញាអញ្ជើញចូលរួមថតខ្សែភាពយន្ត KTV : Killing Time Violently នោះក៏ព្រោះតែកញ្ញាចង់បើកទំព័រអាជីពសម្ដែង និងចង់ប្រឡូកក្នុងការថតខ្សែភាពយន្តនៅកម្ពុជា។ កញ្ញារៀបរាប់ថា កញ្ញាត្រូវជាបងប្អូនស្រីបង្កើតជាមួយតារាក្បាច់គុនល្បុក្កតោ អួ តារា ដែលមានឈាមជ័រជាកូនខ្មែរ ក៏ប៉ុន្តកញ្ញាបានទៅរស់នៅប្រទេសជប៉ុនយូរឆ្នាំ និងសាងកេរ្ដិ៍ឈ្មោះល្បីនៅលើបណ្ដាញសង្គមនៅទីនោះ។ កញ្ញាចាប់អារម្មណ៍ឃើញថា វិស័យខ្សែភាពយន្តនៅកម្ពុជាកំពុងតែរីកចម្រើន ហើយបោះជំហ៊ានទៅកាន់ឆាកអន្តរជាតិថែមទៀត និងជាពិសេសគឺចំពោះស្នាដៃរបស់លោក Jimmy Henderson ដែលធ្លាប់បានដាក់ភាពយន្តផ្សាយនៅលើ Platform ស្ដង់ដាអន្តរជាតិផងដែរ។ កញ្ញាបន្តថា ផលពិបាកនៅក្នុងខ្សែភាពយន្តនេះ គឺការប្រើប្រាស់ភាសា ដែលត្រូវឱ្យកញ្ញាប្រឹងវឹកហាត់បន្ថែមទៀត។
សូមជម្រាបថា រឿង KTV: Killing Time Violently គ្រោងចំណាយ ១៥ ម៉ឺនដុល្លារ នឹងចាប់ផ្តើមបើកកាម៉េរ៉ាចេញថតនៅដើមខែកញ្ញានេះ នឹងគ្រោងធ្វើការចាក់បញ្ចាំងនៅកម្ពុជានៅអំឡុងឆ្នាំ២០២៣។ ក្រៅអំពីការចាក់បញ្ចាំងនៅកម្ពុជា រឿងនេះក៏គ្រោងយកទៅរួមក្នុងមហោស្រពភាពយន្តអន្តរជាតិផ្សេងៗផងដែរ ហើយក៏មានគម្រោងដាក់បញ្ចូលតាម Online platform ជាច្រើននៅអន្តរជាតិ ដើម្បីពង្រីកទីផ្សារភាពយន្តខ្មែរឱ្យកាន់តែទូលំទូលាយជាងពេលបច្ចុប្បន្ន។
