កីឡាករខ្សែប្រយុទ្ធ Erling Haaland បានដើរតួរយ៉ាងល្អក្នុងតួនាទីថ្មីរបស់គេនៅតំបន់ប្រយុទ្ធរបស់ Manchester City ប៉ុន្តែក្លិបនៅ Premier League មួយនេះមិនអាចពឹងផ្អែកលើកីឡាកររូបនេះតែម្នាក់ ដើម្បីឈ្នះពានរង្វាន់ UEFA Champions League បានទេ។ នេះបើតាមការបញ្ជាក់របស់អ្នកចាត់ការ Pep Guardiola លើកឡើងក្នុងពីថ្ងៃចន្ទ សប្ដាហ៍នេះ។
«បើយើងពឹងផ្អែកតែលើ Haaland តែម្នាក់នោះយើងមិនអាចឈ្នះពានរង្វាន់ Champion League នោះទេ។ តែយើងបានបង្កើតឱកាសឱ្យបានច្រើនដល់គាត់ ក្នុងការរទាត់បញ្ជូលទី។ កាលដែលយើងនាំគាត់មកចូលរួមក្នុងក្រុមនោះដោយសារតែយើងខ្វះខ្សែប្រយុទ្ធ»។ បុរសជនជាតិអេស្ប៉ាញ ដែលជាអ្នកចាត់ការក្រុម Man City បញ្ជាក់។
ខ្សែប្រយុទ្ធសញ្ជាតិន័រវេស មានវ័យ ២២ឆ្នាំ Haaland បានចាកចេញពីក្រុម Borussia Dortmund ក្នុងក្របខ័ណ្ឌលីគកំពូលអាល្លឺម៉ង់ ចូលរួមជាមួយ Man City នៅដើមរដូវកាលថ្មីនេះ ព្រមទាំងស៊ុតបញ្ចូលទីបាន១០គ្រាប់ក្នុងក្នុងចំណោម៦ប្រកួតបើករដូវកាល។ ក្នុងវគ្គជម្រុះតាមពូលនៃពានរង្វាន់ Champion League នៅរាត្រីថ្ងៃពុធ នេះរូបគេរកគ្រាប់បាល់បន្ថែម២គ្រាប់ ក្នុងជ័យជម្នះរបស់ Man City ឈ្នះលើSevilla ដោយលទ្ធផល៤ទល់០។
មុនមកដល់ Man City កីឡាកររូបនេះក៏ស៊ុតបញ្ចូលទីចំនួន២៣គ្រាប់ម្នាក់ឯង ក្នុងក្របខ័ណ្ឌ Champions League រួចរាល់ហើយ ខណៈរូបគេក៏ជា Top Score នៅរដូវកាល២០២០-២០២១ ផងដែរក្នុងពានរង្វាន់ទ្វីបអឺរ៉ុប មួយនេះ។
ក្រុមបាល់ទាត់ Manchester City មិនធ្លាប់ឈ្នះជើងឯកពានរង្វាន់ Champions League ម្តងណាឡើយ បើទោះជាម្ចាស់ក្លិបប្រាក់ពាន់លានKhaldoon Al Mubarak បើកខ្ទង់ចំណាយឱ្យលោក Pep Guardiola នាំយកតារាឆ្នើមៗមករួមក្រុមនារយៈពេលប៉ុន្មានឆ្នាំចុងក្រោយនេះក៏ដោយ។ តែក្រុមនេះធ្លាប់បានឡើងដល់វគ្គផ្ដាច់ព្រ័ត្រម្តងនៅឆ្នាំ២០២០-២០២១ កន្លងទៅ តែបានត្រឹមជើងឯករងក្រោយចាញ់ Chelsea ដោយលទ្ធផល ១ទល់០៕