Paris Hilton ដែលជាចៅស្រីរបស់កំពូលសេដ្ឋីម្ចាស់សណ្ឋាគារល្បីត្រកូល Hilton គឺជាសិល្បការិនី (Celebrity) ដ៏ល្បីល្បាញមួយរូប បានសាងកេរ្តិ៍ឈ្មោះ កិត្តយស និង Brand ដោយដៃទាំងគូរបស់ខ្លួន។ យ៉ាងណាមិញថ្មីៗនេះនាងបានធ្វើឱ្យមានការភ្ញាក់ផ្អើលក្រោយនាងបានចេញមកអំពាវនាវនិងអង្វរកសុំជំនួយពីមហាជន ដើម្បីស្វែងរកសុនខមួយក្បាល។
មិនត្រឹមតែ Paris នោះទេដែលមានឈ្មោះល្បីល្បាញលើ Instagram មានចំនួន follower រហូតដល់២០លានគណនី សូម្បីតែសត្វសុនខដែលនាងចិញ្ចឹមក៏ល្បីល្បាញនិងមានមនុស្ស Follow រហូតដល់ទៅជាង៨០ម៉ឺនគណនីដូចគ្នាដែរ។ ដោយឡែក Paris ទើបតែបង្ហោះនៅលើគណនី Instagram របស់ខ្លួនចែករំលែកដំណឹងអាក្រក់ ហើយសុំអំពាវនាវសុំឱ្យមហាជនជួយស្វែងរក Diamond Baby ដែលជាសុនខពូជ Chihuahua បានបាត់ចេញពីផ្ទះ។
«ពួកខ្ញុំបានផ្លាស់ផ្ទះថ្មី ហើយប្រហែលជាអ្នកជញ្ជូនឥវ៉ាន់ម្នាក់ភ្លេចហើយចំហទ្វារចោល» ភ្ជាប់ជាមួយនឹងការរៀបរាប់នេះ Paris មិនខ្លាចនឹងហ៊ានចាយលុយដើម្បីស្វែងរកសត្វចិញ្ចឹមសំណព្វចិត្តរបស់ខ្លួនឡើយនាងបានជួលភ្នាក់ងារស៊ើបអង្កេតស្វែងរកសត្វ, ក្រុមអ្នកមានជំនាញផ្នែកសុនខ,និងគ្រូពេទ្យជំនាញចិត្តសាស្ត្រ ហើយកំពុងតែស្វែងរកជួលសេវាកម្មម៉ាស៊ីនថត ដ្រូន ដើម្បីរកសុនខមួយនោះផងដែរ។
ក្នុងយុទ្ធនាការដ៏សស្រាក់សស្រាំស្វែងរកសុនខបាត់ខ្លួនមួយក្បាលនោះ គណនីសត្វចិញ្ចឹមរបស់នាងដែលមានឈ្មោះរួមថា @HiltonPets បានផ្លាស់ប្ដូរឈ្មោះថ្មីជាបណ្ដោះអាសន្នវិញថា #FindDiamondbaby ហើយបង្ហោះចែកចាយដំណឹងផ្លូវការពីការបាត់ខ្លួនសុនខរបស់នាង។ យោងតាមទស្សនាវដ្ដី Rolling Stone សត្វសុនខ Diamond Baby បានចូលខ្លួនជាសមាជិករបស់គ្រួសារ Hilton តាំងពីឆ្នាំ២០១៦មកម្ល៉េះ ដូច្នេះមិនប្លែកឡើយដែល Paris និង អ្នកគាំទ្ររបស់នាងកើតទុក្ខនិងពិបាកចិត្តខ្លាំងចំពោះការបាត់ខ្លួនសុនខមួយក្បាលនោះ។
អ្នកប្រើប្រាស់ Twiter ម្នាក់បានសរសេរថា៖ «ក្នុងនាមជាអ្នកស្រលាញ់សត្វម្នាក់ ដំណឹងនេះពិតជាធ្វើឱ្យខ្ញុំឈឺចិត្តណាស់។ ខ្ញុំសង្ឃឹមថា Paris បានកូនរបស់នាងត្រលប់មកវិញ។ បេះដូងរបស់នាងប្រាកដជាខ្ទេចខ្ទាំណាស់ហើយ។ ខ្ញុំអាចដឹងច្បាស់ពីអារម្មណ៍របស់នាង»
Paris Hilton បានបង្ហោះទៀតថា អ្នកដែលអាចនាំខ្លួន Diamond Baby ត្រលប់មកវិញដោយសុវត្ថិភាព នឹងទទួលបានរង្វាន់ហើយ មិនមានការសួរនាំឬសួរចម្លើយអ្វីទាំងអស់៕
