ពានរង្វាន់បាល់ទាត់កម្រិតទ្វីបអាស៊ី AFC Cup 2022 រកឃើញក្រុមឡើងដល់វគ្គផ្ដាច់ព្រ័ត្រហើយ គិតត្រឹមពេលនេះ ដោយក្រុមKuala Lumpur City របស់ម៉ាឡេស៊ី ប៉ះក្រុម Al-Seeb របស់អូម៉ង់ បន្ទាប់ពីប្រកួតជម្រុះក្នុងចំណោមក្រុម៤៤មកពី២៧សហព័ន្ធសមាជិកក្នុងទ្វីប។
អ្វីដែលគួរឱ្យកត់សម្គាល់នោះលោក Bojan Hodak ជនជាតិក្រូអាត បានជួយឱ្យក្រុម Kuala Lumpur City ដែលជាក្រុមក្នុងតំបន់អាស៊ាន ឡើងដល់វគ្គផ្ដាច់ព្រ័ត្រជាលើកទី២ បន្ទាប់ពីក្រុម Johor Darul Ta’zim របស់ម៉ាឡេស៊ី ដូចគ្នាធ្លាប់ឈ្នះជើងឯកកាលពីឆ្នាំ២០១៥។
បុរសវ័យ៥១ឆ្នាំរូបនេះធ្លាប់ត្រូវបានលោកឧកញ៉ា ឬទ្ធី សំណាង ថៅកែក្លិបភ្នំពេញក្រោន នាំយកមកជួយក្រុមនៅប្រទេសកម្ពុជា ក្នុងចន្លោះឆ្នាំ២០១០-២០១១ ព្រមទាំងកាលនោះឈ្នះជើងឯកលីគកំពូលកម្ពុជា នឹងធ្លាប់បានជួយក្រុមប្រកួតក្នុងវគ្គជម្រុះពានរង្វាន់ AFC President’s Cup ផងដែរ។
ក្រោយមកចេញពីភ្នំពេញក្រោន លោក Bojan Hodak ទៅធ្វើជាគ្រូជំនួយនៅក្លិប Shandong Taishan សមាជិកលីគកំពូលចិន ហើយក្រោយមកទៀតចន្លោះពីឆ្នាំ២០១២ដល់២០១៩ លោកធ្វើជាគ្រូបង្វឹកតាមក្លិបខ្លាំងៗមួយចំនួននៅម៉ាឡេស៊ីនិងដឹកនាំក្រុម U19 ម៉ាឡេស៊ី ផងដែរ។ ឆ្នាំ២០២០ លោកបានទៅដឹកនាំក្រុម PSM Makassar នៅឥណ្ឌូណេស៊ី មុនធ្វើត្រឡប់ទៅម៉ាឡេស៊ី វិញដោយដឹកនាំក្រុម Kuala Lumpur City។
សូមបញ្ជាក់ថាលទ្ធផលនៅវគ្គពាក់កណ្ដាលផ្ដាច់ព្រ័ត្រក្រុម Al-Seeb របស់អូម៉ង់ យកឈ្នះក្រុម Al-Riffa ដោយលទ្ធផល ៤-០ ខណៈក្រុម Kuala Lumpur City ឈ្នះក្រុម Sogdiana Jizzakh របស់អ៊ូប៊ែគីស្ថាន ដោយបាល់ប៉េណាំងទីកាត់សេចក្តី ៥ទល់៣ ក្រោយប្រកួតស្មើគ្នា៩០នាទីនិងថែមម៉ោង១៥នាទី២ដង ដោយលទ្ធផល ០-០។
សូមបញ្ជាក់ថាពានរង្វាន់បាល់ទាត់ AFC Cup 2022 ធ្វើឡើងពីថ្ងៃទី៥ខែមេសា ដល់២២ ខែតុលា ឆ្នាំ២០២២ ដោយមានក្រុមចូលរួមពី៥តំបន់ក្នុងទ្វីបរួមមាន៖
-អាស៊ីខាងលិច៖ ១២ប្រទេស
-អាស៊ីខាងត្បូង៖ ៧ប្រទេស
-អាស៊ីកណ្ដាល៖៦ប្រទេស
-អាស៊ីអាគ្នេយ៍ (អាស៊ាន)៖ ១២ប្រទេស
-អាស៊ីខាងកើត៖ ១០ប្រទេស
សហព័ន្ធកីឡាបាល់ទាត់អាស៊ី បានបង្កើតរូបមន្តនៃការប្រកួតមានដូចជា វគ្គជម្រុះ Preliminary stage, Play-Off Stage, Group Stage និង Knockout Stage។ ក្រុមឈ្នះជើងឯកនឹងទទួលបានថវិកាចំនួន១លាន៥សែនដុល្លារអាមេរិក ហើយក្រុមជើងឯករងទទួលបាន៧៥ម៉ឺនដុល្លារអាមេរិក ខណៈក្រុមជើងឯកតាមតំបន់ (Zone) នីមួយៗទទួលបានទឹកប្រាក់ ១០ម៉ឺនដុល្លារអាមេរិក៕