បន្ទាប់ពីប្រកាសពន្យារពេលប្រគំតន្ត្រីទេសចរណ៍របស់ខ្លួនជាថ្មី ស្រាប់តែលេចចេញនូវដំណឹងអាក្រក់មួយដែលធ្វើឱ្យអ្នកគាំទ្រមានអារម្មណ៍ស្រងេះស្រងោចជាខ្លាំង ព្រោះតារាចម្រៀងល្បី Justin Bieber ប្រកាសចូលនិវត្តន៍។
ការប្រគំតន្ត្រីទេសចរណ៍របស់តារាចម្រៀងសញ្ជាតិកាណាដារូបនេះ ចាប់ផ្ដើមកាលពីខែកុម្ភៈឆ្នាំ ២០២២ ហើយគ្រោងនឹងបញ្ចប់នៅថ្ងៃទី២៥ ខែមីនា ឆ្នាំ២០២៣។ ប៉ុន្តែចាប់តាំងពីដើមខែកញ្ញាឆ្នាំមុន Justin បានប្រកាសពន្យាពេលការប្រគំតន្ត្រី ហើយសំរាកព្យាបាលដោយសារតែបញ្ហាសុខភាព នៅក្នុងនោះប្រទេសដែលតារារូបនេះផ្អាកការប្រគំតន្ត្រីទេសចរណ៍របស់ខ្លួនមាន ចក្រភពអង់គ្លេស អៀរឡង់ អាល្លឺម៉ង់ អ៊ីតាលី និង ប៉ូឡូញ។ តារារូបនេះបានប្រកាសថាខ្លួនត្រូវការរយៈពេលខ្លះដើម្បីមើលថែទាំសុខភាព ព្រោះលោកចាំបាច់ត្រូវគិតគូរបញ្ហាសុខភាពជាអាទិភាព។
តារារូបនេះបាននិយាយថា៖ «ពេលនេះខ្ញុំចាំបាច់ត្រូវតែសម្រាកពីការប្រគំតន្ត្រីទេសចរណ៍។ ខ្ញុំច្បាស់ជាជាសះស្បើយ ប៉ុន្តែខ្ញុំត្រូវការពេលវេលាសំរាក ទើបជំងឺអាចជាសះស្បើយ!» ប្រភពជិតស្និទ្ធិនឹងតារាចម្រៀងរូបនេះបាននិយាយថា Justin ចាំបាច់ត្រូវការពេលវេលាសំរាក ព្រោះបញ្ហាសុខភាពផ្លូវកាយ និងផ្លូវចិត្តរបស់លោកខ្ទេចខ្ទាំយ៉ាងធ្ងន់ធ្ងរ ដូច្នេះគ្រប់គ្នាមានតែបួងសួងសូមឱ្យតារារូបនេះឆាប់ជាសះស្បើយ»។
នេះមិនមែនជាលើកទីមួយនោះឡើយដែល Justin Bieber ប្រកាសចូលនិវត្តន៍ព្រោះកាលពីខែធ្នូ ឆ្នាំ២០១៣ លោកធ្លាប់បានប្រកាសតាមរយៈ Twitter ប្រាប់អ្នកគាំទ្រលោកថា លោកនឹងចូលនិវត្តន៍ ប៉ុន្តែក្រោយមកលោកចូលមកឆ្លើយខាងក្រោម Caption Twitter លោកវិញថា៖ «ក្រុមផ្សព្វផ្សាយបានលើកយករឿងខ្ញុំមកនិយាយយ៉ាងច្រើន ពួកគេបានបង្កើតរឿងកុហកដើម្បីចង់ផ្ដួលរំលំខ្ញុំ ប៉ុន្តែខ្ញុំមិនចាកចោលអ្នកទាំងអស់គ្នានោះទេ ធ្វើជាអ្នកគាំទ្រ Bieber គឺជា Lifestyles»។
សរុបមកវិញ Justin Bieber មិនដែលឈប់ ឬចូលនិវត្តន៍ចោលវិស័យតន្ត្រីនោះឡើយ លើកនេះក៏អាចដូចជាលើកមុន លោកគ្រាន់តែត្រូវការពេលវេលាសំរាកព្យាបាល ពេលជំងឺបានសះស្បើយ លោកប្រាកដជាត្រលប់មកវិញមិនខាន៕