រូបថតញ៉ាំចេកដែល Sandara Park បានបង្ហោះលើ IG របស់នាងកំពុងតែទទួលបានការចាប់អារម្មណ៍យ៉ាងខ្លាំង ជាពិសេសនោះគឺអាថ៌កំបាំងនៅពីក្រោយរូបថតញ៉ាំចេកនេះតែម្ដង។
«ញ៉ាំចេកផឹកទឹក» ប្រយោគល្បីនេះស័ក្តិសមនឹងប្រើជាមួយស្រីស្អាត Sandara Park ណាស់ ព្រោះថ្មីៗនេះ រូបថតដែលតារាចម្រៀងល្បីអតីតក្រុម 2NE1 បានចែករំលែកលើ Instagram របស់នាងគឺរូបភាពញ៉ាំចេក ដែលធ្វើឱ្យមានការចាប់អារម្មណ៍នឹងក្លាយជាដំណឹងក្ដៅត្រូវបានចែករំលែកខ្លាំងលើបណ្ដាញសង្គម។ រូបភាពដែលត្រូវបានអ្នកគាំទ្រមើលឃើញថា Cute និងមើលទៅគួរឱ្យស្រលាញ់នេះ គឺពិតណាស់ មានអាថ៌កំបាំងដ៏សំខាន់មួយនៅពីក្រោយរូបភាពនោះ។
តាមរយៈសំណេរក្រោមរូបថតរបស់នាងបានបង្ហាញថាពេលនេះ Sandara កំពុងស្ថិតក្នុងដំណាក់កាលតមអាហារ។ ស្រាប់តែតារាចម្រៀង Younha បានសរសេរនៅពីក្រោមផុសរបស់ Sandara Park ថា៖ «ហេតុអីតមអាហារ?» សាមីខ្លួន Sandara បានចូលមកឆ្លើយតបថា៖ «ពេលនេះខ្ញុំឡើងគីឡូ។ ម្ហូបគ្រប់មុខសុទ្ធតែឆ្ងាញ់»។
អតីតសមាជិក 2NE1 ដែលជា Girl Group ដ៏ល្បីនិងមានឥទ្ធិពលក្នុងស្រទាប់យុវវ័យត្រូវបានគេចាត់ទុកថាជានិមិត្តសញ្ញាស្គមនៅក្នុងវិស័យឧស្សាហកម្មសិល្បៈ K-pop ដោយសារតែនាងមិនដែលមានឡើងទម្ងន់ទាល់តែសោះចាប់តាំងពីហក់ចូលប្រឡូកក្នុងសិល្បៈមក។
នៅក្នុងកម្មវិធី KBS2’s Problem Child in the House កញ្ញា Sandara បានរំលឹកដល់អតីតកាលដែលនាងអាចរក្សាគីឡូត្រឹម៣៨-៣៩ គីឡូដោយមិនចាំបាច់តមអាហារ ដោយកាលណោះទំហំសំលៀកបំពាក់របស់នាងពាក់ត្រឹមលេខ៣៣ (ទំហំស្ត្រីអាមេរិកគឺលេខ XXS)។ Sandara ចែករំលែកទៀតថាកាលណោះនាងពិតជាបារម្ភខ្លាំងណាស់ដែលនាងស្គមពេក ហើយសង្ឃឹមថានឹងឆាប់បានឡើងគីឡូ។
នៅក្នុងកម្មវិធីខាងលើដដែល Sandara បានបន្តឱ្យដឹងថាបន្ទាប់ពីស្គាល់តារាកំប្លែង Kim Sook និង Park Na Rae អ្នកទាំងពីរនោះជាមនុស្សចូលចិត្តញ៉ាំ Sandara ស្រាប់តែឡើងគីឡូពី៧ទៅ៨គីឡូ។ Sandara ក៏បានសារភាពក្នុងកម្មវិធីProblem Child in the House ដែរថានោះគឺជាលើកដំបូងក្នុងជីវិតដែលកញ្ញាចាប់ផ្ដើមអស់លុយចូល Gym ក្នុងឋានៈជាសមាជិកដើម្បីបញ្ចុះគីឡូ។
រំលឹកឡើងវិញដែរ Sandara កាលពីពេលថ្មីៗនេះក៏ស្ថិតក្នុងការចាប់អារម្មណ៍និងតាមដានពីបណ្ដាញសារព័ត៌មានក៏ដូចជាអ្នកគាំទ្រដែរ នៅពេលមានដំណឹងលេចឮថាតារារូបនេះនឹងចាកចេញពីផលិតកម្ម YG entertainment ក្រោយស្ថិតក្រោមដំបូលផលិតកម្មនេះរយៈពេល១៧ឆ្នាំ។ ប៉ុន្តែមកទល់នឹងពេលនេះមិនទាន់មានដំណឹងណាលេចឮមកទៀតនៅឡើយទេ៕