សហព័ន្ធកីឡាបាល់ទាត់កម្ពុជា (FFC) កាលពីព្រឹកថ្ងៃសុក្រ ទី២១ បានប្រកាសពីការបញ្ចប់ការសិក្សា និងហ្វឹកហាត់របស់យុវជនចំនួន៩នាក់ នៅមជ្ឈមណ្ឌល និងសាលាកីឡាបាល់ទាត់ជាតិ បាទី គឺមានន័យថាពួកគេដល់ពេលវេលា ដែលត្រូវប្រើចំណេះ និងជំនាញនៅក្នុងអាជីពជាអ្នកបាល់ទាត់ជាផ្លូវការ។
តាមរយៈការប្រកាសព័ត៌មាន កាលពីព្រឹកថ្ងៃសុក្រនេះ FFC បានបញ្ជាក់ថា កីឡាករ យ៉ង់ ភូមិន្ទ, អ៊ាវ សុវណ្ណរ៉ា, ហួត វ៉ាន់ណេត, ម៉េង សុភា និង សួន សាវឌី, រ៉េត លីហេង, ឃាន់ សុបិន, ហេង សុវណ្ណបញ្ញា និង ចាន់វិបុល ដាវីឌ ដែលបានក្រេបជញ្ជក់ចំណេះដឹងទាំងផ្នែកការសិក្សារៀនសូត្រ និងជំនាញបាល់ទាត់ អស់រយៈពេលជាច្រើនឆ្នាំនៅមជ្ឈមណ្ឌល និងសាលាកីឡាបាល់ទាត់ជាតិ នោះបានបញ្ចប់ការសិក្សា និងការហ្វឹកហាត់ជាផ្លូវការ។
ជាមួយគ្នានេះសហព័ន្ធកីឡាបាល់ទាត់កម្ពុជា (FFC) បានជូនដំណឹងដល់ក្លិប-សមាគមបាល់ទាត់ ជាសមាជិករបស់សហព័ន្ធកីឡាបាល់ទាត់កម្ពុជា ដែលមានបំណងចង់បានអ្នកទាំង៩នាក់នេះ យកទៅលេងឱ្យក្លិប ឬសមាគមរបស់ខ្លួន សូមទាក់ទងមកសហព័ន្ធ៕
