យុវជន សួន សាវឌី កើតនៅថ្ងៃទី ១៩ ខែមីនា ឆ្នាំ២០០៥ កីឡាកររូបនេះជាអតីតកីឡាករនៃសាលាបាល់ទាត់តម្រង់ទិសខេត្តកំពតអាយុក្រោម ១៥ឆ្នាំ បានធ្វើតេស្តជាប់សាលាបាល់ទាត់ជាតិបាទីកាលពីដើមឆ្នាំ២០២០ និងបានហ្វឹកហាត់នៅទីនោះគិតមកដល់ពេលនេះអស់រយៈពេលជិត៣ឆ្នាំមកហើយ។
ថ្មីៗនេះយុវជន សួន សាវឌី ត្រូវបានសហព័ន្ធកីឡាបាល់ទាត់ជាតិបាទីប្រកាសការសិក្សា ត្រូវបានបញ្ចប់ក្នុងចំណោម ៩នាក់ ដោយផ្តល់ឱកាសអោយចូលរួមក្លិបណាមួយដែលសាកសម។ ខណៈពេលដែលសាមីខ្លួនកំពុងរង់ចាំការចរចាពីបណ្តាក្លិបអាជីពសម្រេចវាសនារបស់ខ្លួន។
ក្រៅពី សួន សាវឌី ក៏មានកីឡាករផ្សេងទៀតដូចជា យ៉ង់ ភូមិន្ទ, អ៊ាវ សុវណ្ណរ៉ា, ហួត វ៉ាន់ណេត, ម៉េង សុភា, រ៉េត លីហេង, ឃាន់ សុបិន, ហេង សុវណ្ណបញ្ញា និង ចាន់វិបុល ដាវីឌ ដែលបានក្រេបជញ្ជក់ចំណេះដឹងទាំងផ្នែកការសិក្សារៀនសូត្រ និងជំនាញបាល់ទាត់ អស់រយៈពេលជាច្រើនឆ្នាំនៅមជ្ឈមណ្ឌល និងសាលាកីឡាបាល់ទាត់ជាតិ នោះបានបញ្ចប់ការសិក្សា និងការហ្វឹកហាត់ជាផ្លូវការ។
គួរបញ្ជាក់ផងដែរថា កីឡាករ សួន សាវឌី ជាយុវជនកើតចេញពីការបណ្តុះបណ្តាលចេញពីថ្នាលយុវជនរបស់សាលាតម្រង់ទិសខេត្តកំពត។ នេះជាមោទនភាពមួយសម្រាប់ខេត្តកំពតដែលមានកីឡាករល្អកើតចេញពីថ្នាលយុជន និងមានឱកាសចូលរួមហ្វឹកហាត់នៅសាលាបាល់ទាត់ជាតិបាទីអភិវឌ្ឍន៍ខ្លួន ថ្វីត្បិតសាលាតម្រង់ទិសខេត្តកំពតមិនទាន់ជោគជ័យក្នុងពានរង្វាន់ជើងឯកយុវជន ប៉ុន្តែនេះជាការជោគជ័យមួយដ៏ធំសំរាប់សាលាតម្រង់ទិសខេត្តកំពតដែលបានដុសខាត់យុវជនអោយមានសមត្ថភាពជាធនធានជួយអភិវឌ្ឍន៍ដល់កីឡាកម្ពុជា។
ជាមួយគ្នានេះសហព័ន្ធកីឡាបាល់ទាត់កម្ពុជា (FFC) បានជូនដំណឹងដល់ក្លិប-សមាគមបាល់ទាត់ ជាសមាជិករបស់សហព័ន្ធកីឡាបាល់ទាត់កម្ពុជា ដែលមានបំណងចង់បានអ្នកទាំង៩នាក់នេះ យកទៅលេងឱ្យក្លិប ឬសមាគមរបស់ខ្លួន សូមទាក់ទងមកសហព័ន្ធ៕
