ពានរង្វាន់កម្រិតទ្វីបអាស៊ី AFC Cup ឆ្នាំ២០២២ រកឃើញម្ចាស់ជើងឯកហើយ ក្រោយប្រកួតជម្រុះពីខែមេសា ក្នុងចំណោមក្លិប៤៤ មកពី២៧សហព័ន្ធ ជុំវិញទ្វីបមក ខណៈម្ចាស់ជើងឯកឆ្នាំនេះបានទៅក្លិបមកពីប្រទេសអូម៉ង់ ហើយនេះជាលើកដំបូងហើយដែលក្លិបរបស់ប្រទេសអូម៉ង់ ឈ្នះជើងឯកតាំងពីពានរង្វាន់នេះបង្កើតឡើងដំបូងក្នុងឆ្នាំ ២០០៤ មក។
លទ្ធផលវគ្គផ្ដាច់ព្រ័ត្រ AFC Cup 2022 ដែលធ្វើឡើងនៅកីឡដ្ឋាន Bukit Jalil National Stadium ក្នុងទីក្រុងកូឡាឡាំពួរ ប្រទេសម៉ាឡេស៊ី ក្រុមAl-Seeb របស់អូម៉ង់ បានយកឈ្នះក្រុម Kuala Lumpur City របស់ម៉ាឡេស៊ី ដោយលទ្ធផល ៣ទល់០ នាល្ងាចថ្ងៃសៅរ៍ ទី២៣ ខែតុលា ឆ្នាំ២០២២។
ម្ចាស់គ្រាប់បាល់ជ័យជម្នះទាំង៣គ្រាប់របស់ Al-Seeb រកបានដោយកីឡាករ Al-Busaidi នៅនាទី ២២ កីឡាករ Al-Muqbalj នៅនាទី៣៧ និងកីឡាករ Al-Ghassani នៅនាទី៦៩ ខណៈការប្រកួតនេះដឹកនាំដោយលោកអាជ្ញាកណ្ដាល Shaun Evans ជនជាតិអូស្រ្តាលី ក្រោមក្រសែភ្នែកទស្សិនជនចូលទស្សនាផ្ទាល់ ២៧,៧២២នាក់។
១៩ឆ្នាំនៃពានរង្វាន់ AFC Cup ដំណើរការមកនេះ ក្រុម Al-Kuwait របស់គុយវែត និងក្រុម Al-Quwa Al-Jawiya ឈ្នះជើងឯកច្រើនជាងគេស្មើគ្នា ពោលគឺ៣លើកម្នាក់។ ចំណែកក្រុម Johor Darul Ta’zim របស់ម៉ាឡេស៊ី ជាក្រុមតែមួយគត់របស់អាស៊ាន ដែលឈ្នះជើងឯកពានរង្វាន់នេះ គឺនៅឆ្នាំ២០១៥៕