អ្នកចាំទី Worawut Sukuna សមាជិករបស់ក្លិបបាល់ទាត់ Chonburi FC នៃលីគកំពូលថៃ ពេលនេះត្រូវបានក្លិបសម្រេចបញ្ចប់កិច្ចសន្យា ក្រោយបើកបរក្នុងស្ថានភាពស្រវឹងបង្កគ្រោះថ្នាក់ដល់អាយុជីវិតមនុស្សម្នាក់ដែលកំពុងរត់ហាត់ប្រាណ និងរបួសម្នាក់ទៀត។
ប៉ូលីស គ្រូពេទ្យ និងបុគ្គលិកសង្គ្រោះបានទៅដល់កន្លែងកើតហេតុ ដើម្បីស្វែងរក និងឃើញថា លោកស្រី Kanya Ponghatsabon អាយុ ៦២ឆ្នាំបានស្លាប់។ នាងស្ថិតក្នុងសំលៀកបំពាក់ហាត់ប្រាណ។ ជើងស្តាំរបស់នាងបានបាក់ ហើយលលាដ៍ក្បាលរបស់នាងបានបែក។ គេក៏បានរកឃើញអ្នករងរបួសធ្ងន់ដែលបាក់ជើងស្តាំផងដែរ។ ហើយត្រូវបានបញ្ជូនទៅមន្ទីរពេទ្យភ្លាមៗ។
ទន្ទឹមនឹងនេះលោក Sasis Singtothong ក៏បានលាលែងពីតំណែងជាអ្នកចាត់ការក្លិប Chonburi FC ដើម្បីទទួលខុសត្រូវចំពោះឧប្បត្តិហេតុ ដែលអ្នកចាំទី Worawut Sukhuna បានបើកបរក្នុងស្ថានភាពស្រវឹង ហើយបានបង្កគ្រោះថ្នាក់ដល់អ្នកដទៃ៕