សិល្បៈអន្តរជាតិ៖ នៅពេលនេះគ្រប់ការប្រគំតន្ត្រី កម្មវិធី ហាឡូវីន (Halloween) និងកម្មវិធីកម្សាន្តនានានៅកូរ៉េ ត្រូវបានរំសាយចោលទាំងអស់ ក្រោយកើតមានសោកនាដកម្មជាន់គ្នាកើតឡើងនៅតំបន់ Itaewon។ នេះបើតាមការផ្សាយរបស់ billboard។
បន្ទាប់ពីកើតមានសោកនាដកម្មបណ្ដាលឱ្យមនុស្សជាង ១៥០នាក់ស្លាប់ក្នុងហេតុការណ៍មនុស្សជាន់គ្នាស្លាប់ក្នុងកម្មវិធី Halloween កាលពីចុងសប្ដាហ៍មុន ក្នុងក្រុង សេអ៊ូល កម្មវិធីតន្ត្រីនានានិងការចេញអាល់ប៊ុមចម្រៀងថ្មីៗ ត្រូវបានលុបចោល។
សារព័ត៌មាន The New York Times បានផ្សាយថា អាជ្ញាធរកូរ៉េនៅមិនទាន់ដឹងច្បាស់លាស់នៅឡើយទេពីមូលហេតុដែលបណ្ដាលឱ្យកើតមានឧប្បទ្ទវហេតុមនុស្សជាន់គ្នាស្លាប់និងរបួស។ ប្រធានាធិបតីកូរ៉េខាងត្បូងលោក Yoon Sukyeol បានប្រកាសកាន់ទុក្ខទូទាំងប្រទេសក្រោយមានហេតុការណ៍ស្លាប់មនុស្សយ៉ាងច្រើននេះ រហូតដល់ថ្ងៃសៅរ៍ទី៥ ខែវិច្ឆិកា។
បន្ទាប់ពីហេតុការណ៍សោកនាដកម្មនេះ វិស័យឧស្សាហកម្មតន្ត្រី K-pop បានប្រកាសលុបចោលកាលបរិច្ឆេទគ្រប់កម្មវិធីទាំងអស់ មិនថាជាការប្រគំតន្ត្រី ឬការចេញអាល់ប៊ុមចម្រៀងថ្មីៗនោះឡើយ។ តារាចម្រៀងនិងក្រុមចម្រៀងដែលបានប្រកាសលុបចោលការប្រគំតន្ត្រី, ការប្រូម៉ូដការងារសិល្បៈ, ជំនួបជាមួយអ្នកគាំទ្រ, ការLive stream នៅលើប្រព័ន្ធអនឡាញ, រូបភាពផ្សេងៗ ដោយក្នុងនោះភាគច្រើនគឺមានពាក់ព័ន្ធនឹងបុណ្យ Halloween រួមមាន៖
BTS, Roy Kim, formis_9, Oh My Girl, Tomorrow X Together, Stray Kids, Park Jihoon, The Boyz, Yuju, DKZ, Wonho, ENHYPEN, StayC, aespa, P1Harmony, CRAVITY, EPEX, Kwon Eunbi, Kepler។
កម្មវិធីប្រគំតន្ត្រី 2022 Busan One Asian Festival ដែលគ្រោងប្រគំនៅថ្ងៃទី៣០ ខែតុលា រួមមានតារាចម្រៀងដូចជា Brave Girls, Golden Child, MAMAMOO, Pentagon, (G)I-DLE, AB6IX,WEi, និង LE SSERAFIM ក៏បានលុបចោលដែរ។
ផលិតកម្ម SM Entertainment បានលុបចោលសេចក្ដីប្រកាសពាក់ព័ន្ធនឹងកម្មវិធី Halloween ដែលមានឈ្មោះថា «SMTOWN WONDERLAND 2022» របស់ខ្លួនចោល ដោយកម្មវិធីនោះមាន Live Stream និងដើរលើកម្រាលព្រំក្រហម ដោយតារា សិល្បកររបស់ខ្លួនតុបតែងខ្លួនតាមបែប Halloween ផងដែរ។
ដោយឡែកផលិតកម្ម YG Entertainment និងផលិតកម្ម HYBE ក៏បានប្រកាសលុបចោលកម្មវិធីនានារបស់ខ្លួនជាបណ្ដោះអាសន្នដូចគ្នាផងដែរ។ ចំណែកកម្មវិធីប្រគំតន្ត្រីផ្សាយផ្ទាល់ជារៀងរាល់សប្ដាហ៍ដូចជា Inkigayo របស់ទូរទស្សន៍ SBS នៅថ្ងៃទី៣០ និង The Show របស់ទូរទស្សន៍ខ្សែកាប SBSM នៅថ្ងៃទី១ ខែវិច្ឆិកាក៏បានប្រកាសលុបចោលការផ្សាយផ្ទាល់របស់ខ្លួនដូចគ្នាដែរ៕
ប្រភព៖ billboard