នៅពេលថ្មីៗនេះ បវរកញ្ញាឯកដ៏អស្ចារ្យតំណាងឱ្យប្រទេស Mauritius គឺកញ្ញា Yuvna Rinishta បានបង្ហោះរូបភាពលិខិតលាលែងពីតំណែងមកុដ 5th Runner Up ពីកម្មវិធី Miss Grand International នៅលើបណ្ដាញសង្គម Instagram របស់នាង ដោយនាងបានបញ្ជាក់ពីមូលហេតុជាច្រើនឱ្យមហាជនអ្នកគាំទ្រដឹង។
កញ្ញា Yuvna Rinishta បានរៀបរាប់ក្នុងលិខិតថា៖ «នាងខ្ញុំ Rinishta Gookool (Yuvna Rinishta) បានសម្រេចចិត្តលាលែងពីតំណែង Top 10th (5th runners up) នៃកម្មវិធី Miss Grand International 2022 មូលហេតុដោយសារតែខ្ញុំមិនអាចចុះកុងត្រា និងបញ្ចប់កិច្ចសន្យាបាន ទើបនាងខ្ញុំមិនអាចបំពេញការងារបន្តជាមួយមុខតំណែង។ ខ្ញុំបានប្រគល់មកុដ និងខ្សែឆៀងទៅកម្មវិធីវិញ ហើយយល់ព្រមថា ខ្ញុំនឹងមិនអាចប្រើកិត្តិនាម និងទាមទារសំណងណាមួយពី MGI ឡើយតាមរយៈការសម្រេចចិត្តនេះ»។
ជាមួយគ្នានោះដែរ មានការលើកឡើងពីលោក Nawat Itsaragrisil ចំពោះបញ្ហានេះថា មែនទែនទៅមូលហេតុគឺបណ្តាលមកពី Miss Grand Mauritius មានបុរសអាថ៌កំបាំងម្នាក់អមដំណើរកញ្ញាក្នុងសកម្មភាពផ្សេងៗ ឬសម្រាកនៅកន្លែងផ្សេងៗជាមួយគ្នាក្រុមការងារ Miss Grand ប៉ុន្តែមិនបានរំខានក្នុងការចំណាយផ្សេងៗនោះទេ។
លោកបន្តថា បុរសរូបនេះតែងតែសួរទៅកាន់ក្រុមការងារថាត្រូវទៅណាខ្លះ? ត្រូវធ្វើអ្វីខ្លះ? បុរសនេះត្រួតត្រាការសម្រេចចិត្តផ្សេងៗរបស់បវកញ្ញារូបនេះរហូត ទាល់តែខាងក្រុមការងារ Miss Grand ហៅមករកដំណោះស្រាយ។ បុរសនេះក៏ជាអ្នកនៅពីក្រោយការសម្រេចចិត្តលាលែងដំណែង រងទី5 ដោយមិនព្រមចុះកុងត្រាមួយឆ្នាំជាមួយស្ថាប័នផងដែរ។
យ៉ាងណាមិញលោក Nawat Itsaragrisil បានប្រាប់អ្នកគាំទ្រថា « សូមកុំនាំគ្នាថាកញ្ញាអី នាងគួរឱ្យស្រលាញ់ណាស់ ហើយក៏ធ្លាប់បានចចារដែរថា ពេលទៅដល់ប្រទេសថៃ ត្រូវធ្វើអីខ្លះ ត្រូវរៀនសូត្រអីខ្លះ តែរឿងក៏បានក្លាយជាបែបនេះទៅហើយ។ ទោះជាយ៉ាងណាក្រុមការងារ Miss Grand International មានតែធ្វើតាមនិតិវិធី។
គួរបញ្ជាក់ឱ្យថា ចំពោះតំណែងលំដាប់រងទី ៥ ដែលត្រូវជំនួសបវរកញ្ញាប្រទេស Mauritius គឺបានទៅលើបវរកញ្ញាមកពីប្រទេសហ្វីលីពីន កញ្ញា Roberta Tamondong។
ប្រភព៖ komchadluek
