អ្នកចាំទី កែវ សុខសិលា របស់ក្រុមវិសាខា ចាប់ផ្តើមពី Zero ទៅជា Hero ក្នុងវគ្គផ្ដាច់ព្រ័ត្រឆ្នាំ ២០២២ នេះនៃពានរង្វាន់សម្តេចតេជោ ហ៊ុន សែន ពោលគឺធ្វើឱ្យរបូតគ្រាប់បាល់ដល់ទៅ២គ្រាប់ មុន ហើយជាអ្នករកគ្រាប់បាល់តាមស្មើវិញ នៅវិនាទី ចុងក្រោយនៃម៉ោងប្រកួត៩០នាទីពេញ ក្រោមការដឹកនាំដោយលោកអាជ្ញាកណ្តាល ជី សាមឌី។
គ្រាប់បាល់ចុងក្រោយនេះ បានចារឈ្មោះ កែវ សុខសិលា ជាអ្នកចាំទីរកគ្រាប់បាល់ជាលើកដំបូងក្នុងប្រវត្តិសាស្រ្តពានរង្វាន់បាល់ទាត់សម្តេចតេជោ ហ៊ុន សែន ក្នុងរយៈពេល១៦ឆ្នាំមកនេះ។
ក្រៅពីធ្លាប់ឈ្នះស្រោមដៃមាសក្នុងពានរង្វាន់លីគកំពូលកម្ពុជាឆ្នាំ២០១៥ កីឡាករ កែវ សុខសិលា បានបង្កើតកំណត់ត្រាថ្មីបន្ថែមទៀតក្នុងពានរង្វាន់សម្តេចតេជោ ហ៊ុន សែន ដោយឈ្នះស្រោមដៃមាសរហូតដល់៣លើកជាប់ៗគ្នា ដែលមិនធ្លាប់មានអ្នកចាំទីណា ធ្វើបានពីមុនមកទេ។ ពានរង្វាន់ឯកត្តជននេះ កែវ សុខសិលា ឈ្នះ៣ឆ្នាំជាប់ៗគ្នា ពោលគឺឆ្នាំ ២០២០, ២០២១ និង ២០២២។
ពោលគឺនៅឆ្នាំ២០២២ នេះវិសាខាឈ្នះគ្រប់ការប្រកួត ខណ:អ្នកចាំទី កែវ សុខសិលា បិទមិនឲ្យគូប្រកួតទាត់ចូល២លើក និងរបូតគ្រាប់បាល់តែ៩គ្រាប់ប៉ុណ្ណោះ៖
*វគ្គ១៦ក្រុមចុងក្រោយ
-ជើងទី១៖ សៀមរាប ០-៦ វិសាខា
-ជើងទី២៖ វិសាខា ៣-២ សៀមរាប
*វគ្គ៨ក្រុមចុងក្រោយ
-ជើងទី១៖ Tiffy Army FC ១-៣ វិសាខា
-ជើងទី២៖ វិសាខា ៣-០ Tiffy Army FC
*វគ្គពាក់កណ្តាលផ្ដាច់ព្រ័ត្រ
-ជើងទី១៖ ភ្នំពេញក្រោន ១-២ វិសាខា
-ជើងទី២៖ វិសាខា ២-១ ភ្នំពេញក្រោន
*វគ្គផ្ដាច់ព្រ័ត្រ
-បឹងកេត ២-២ វិសាខា (ថែមម៉ោង១៥នាទីចំនួន២លើក បឹងកេត ៣-៤ វិសាខា)។
ខណ:ក្រុមបាល់ទាត់វិសាខា បង្កើតឡើងនៅឆ្នាំ២០១៧ ហើយក្រុមនេះបានចូលរួមលេងក្នុងពានរង្វាន់សម្តេចតេជោ ហ៊ុន សែន នៅឆ្នាំ២០១៨ រហូតដល់បច្ចុប្បន្ន ខណៈអាយុកាលរបស់ក្រុមនេះនៅក្មេងខ្ចីនៅឡើយ បើធៀបទៅនឹងក្រុមផ្សេងៗដែលធ្លាប់គ្រងជើងឯកពានរង្វាន់ដ៏សំខាន់ប្រចាំប្រទេសកម្ពុជា មួយនេះ។
–ឆ្នាំ២០១៨ វិសាខា ធ្លាក់ចេញត្រឹមវគ្គ១៦ក្រុមចុងក្រោយ បន្ទាប់ពីចាញ់ព្រះខ័នរាជស្វាយរៀង ទាំង២ជើង ដោយលទ្ធផល ២ទល់១។
-ឆ្នាំ២០១៩ វិសាខា ឈ្នះមេដាយសំរឹទ្ធិ ស្ទួន ជាមួយក្រុមបាល់ទាត់ភ្នំពេញក្រោន ក្រោយចាញ់ក្រុមបឹងកេត នៅវគ្គពាក់កណ្តាលផ្ដាច់ព្រ័ត្រ ដោយលទ្ធផល៤ទល់០។
-ឆ្នាំ២០២០ ឈ្នះជើងឯក
-ឆ្នាំ២០២១ ឈ្នះជើងឯក ព្រមទាំងទទួលកៅអីពានរង្វាន់កម្រិតទ្វីបអាស៊ី AFC Cup ដោយស្វ័យប្រវត្តិទៀតផង
-ឆ្នាំ២០២២ ឈ្នះជើងឯក ក្នុងកំណត់ត្រាមិនធ្លាប់ចាញ់ទាល់តែសោះ និងទាត់បញ្ជូលទីគូប្រកួតបានច្រើនគ្រាប់ជាងគេរហូតដល់២៤គ្រាប់៕
