នៅថ្ងៃពុធ ទី៩ ខែវិច្ឆិកា ឆ្នាំ២០២២ ថ្មីៗនេះ សហព័ន្ធកីឡាបាល់ទាត់ថៃ បានតែងតាំងលោក Issara Sritaro ជាគ្រូបង្វឹកក្រុមបាល់ទាត់ជម្រើសជាតិថៃ ក្រោមអាយុ២៣ឆ្នាំ (U23) ហើយក្នុងនោះក៏តែងតាំងលោក Yuthana Yimkarun ជាអ្នកចាត់ការទូទៅក្រុម។
ថ្នាក់ដឹកនាំរបស់ក្រុម U23 របស់ថៃ នេះមានភារកិច្ចដឹកនាំក្រុមចូលរួមដណ្តើមមេដាយក្នុងព្រឹត្តិការណ៍កីឡាស៊ីហ្គេមឆ្នាំ២០២៣ នៅរាជធានីភ្នំពេញ ការប្រកួតកីឡាអាស៊ី Asian Games និងចូលរួមជម្រុះព្រឹត្តិការណ៍កីឡាអូឡាំពិក 2024 Olympics នៅទីក្រុងប៉ារីស ប្រទេសបារាំង ទៀតផង។
អត្ថបទពាក់ព័ន្ធ៖នាយករដ្ឋមន្រ្តីថៃ៖ បើបាល់ទាត់មិនឈ្នះមេដាយមាសទាំង២គ្រឿងពីស៊ីហ្គេមនៅកម្ពុជា អ្នកណាទទួលខុសត្រូវ?
បើតាមសារព័ត៌មានក្នុងស្រុករបស់ថៃ លោក Issara Sritaro បានជ្រើសរើសអតីតខ្សែប្រយុទ្ធក្រុមជម្រើសជាតិថៃ Bumrung Boonprom និងខ្សែបម្រើ Krongpol Daoruang ជាជំនួយការគ្រូបង្វឹក ខណៈ Prasopchok Chokmao ជាគ្រូអ្នកចាំទី។
លោក Issara Sritaro ដែលធ្លាប់នាំក្រុម U17 របស់ថៃ ជោគជ័យលើឆាកអន្តរជាតិនាពេលកន្លងទៅបានបញ្ជាក់ថា៖«ខ្ញុំរីករាយដែលបានត្រឡប់មកកាន់កៅអីក្រុមជម្រើសជាតិឡើងវិញ។ គោលដៅរបស់សហព័ន្ធ ចង់ឱ្យយើងទៅប្រកួតកីឡាអូឡាំពិក ឆ្នាំ២០២៤ នៅទីក្រុងប៉ារីស។ ដើម្បីឱ្យដល់គោលដៅ យើងត្រូវប្រឹងប្រែងគ្រប់ព្រឹត្តិការណ៍ដែលត្រូវចូលរួមចាប់ពីស៊ីហ្គេម ទៅដល់ Asian Games ជាដើម»។
ក្រុម U23 ថៃ ធ្លាប់ឈ្នះមេដាយមាសស៊ីហ្គេម រហូតដល់ទៅ៧លើក ខណៈក្រុមនេះតែងតែតំណាងឱ្យតំបន់អាស៊ាន ចេញទៅប្រកួតជើងឯកកម្រិតទ្វីបអាស៊ី ជាប្រចាំផងដែរ។
អត្ថបទពាក់ព័ន្ធ៖កីឡាករម្នាក់នៅលីគទី៣ថៃ ត្រូវក្លិបបញ្ចប់កិច្ចសន្យាភ្លាមៗ ក្រោយវាយគូប្រកួតដេរ២៤ថ្នេរ(វីដេអូ)
លោកបានដឹងពីបញ្ហាប្រឈមរបស់សហព័ន្ធ ដែលរងផលប៉ះពាល់ពីជំងឺកូវីដ-១៩ ជាពិសេសបញ្ហាហិរញ្ញវត្ថុ។ «កាតព្វកិច្ចចម្បងរបស់ខ្ញុំគឺមើលពីតម្រូវការចាំបាច់នៅក្នុងក្រុម។ ប៉ុន្តែខ្ញុំនឹងជួយសម្របសម្រួលជាមួយខាងអ្នកឧបត្ថម្ភ និងក្លិបពាក់ព័ន្ធនានា»។ គ្រូបង្វឹកវ័យ៤២ឆ្នាំបន្ថែម។
ជាកូនអ្នកស្រុក Suphan Buri លោក Issara ធ្លាប់ជាប់ជម្រើសជាតិថៃ ឈុតយុវជន U17 នៅចន្លោះឆ្នាំ១៩៩៦-១៩៩៧ ហើយក្រោយមកទៀតចាប់ពីឆ្នាំ២០១២ មកលោកបានវិវត្តន៍ខ្លួនជាគ្រូបង្វឹក ដោយចូលដឹកនាំក្រុមនៅក្នុងប្រទេសខ្លួនដូចជា Chainat Hornbill, Army United, Looktabfah, Buriram United B និងចុងក្រោយឆ្នាំ២០២១-២០២២ ថ្មីៗនេះលោកដឹកនាំក្រុម PT Prachuap។
អត្ថបទពាក់ព័ន្ធ៖ថៃ ណាត់មីយ៉ាន់ម៉ា និងតៃវ៉ាន់ ប្រកួតមិត្តភាពអន្តរជាតិមុនចូលរួមពាន2022 AFF Championship
ចំណែកក្រុមជម្រើសជាតិថៃ លោកធ្លាប់ជាគ្រូជំនួយក្រុម U23 ថៃ ចន្លោះឆ្នាំ២០១៦-១៧ មុនទទួលឱកាសជាគ្រូបង្វឹកក្រុម U17 និង U19 របស់ថៃ និងបន្តឡើងទៅធ្វើជាគ្រូជំនួយក្រុមឈុតធំថៃ ទៀតផង៕