សហព័ន្ធកីឡាប៊ូលនិងប៉េតង់ កម្ពុជា បានបញ្ជូនប្រតិភូ គ្រូបង្វឹក និងកីឡាករ កីឡាការិនី ចំនួន២៧នាក់ចេញទៅប្រកួតដណ្តើមមេដាយក្នុងព្រឹត្តិការណ៍ជើងឯកប្រចាំទ្វីបអាស៊ី លើកទី៤ (4th Asian Petanque Championship 2022) នៅរាជធានីបាងកក ប្រទេសថៃ។
ការប្រកួតជើងឯកទ្វីបនេះ នឹងធ្វើឡើងចាប់ពីថ្ងៃទី១០ ដល់ថ្ងៃទី១៤ ខែវិច្ឆិកា ឆ្នាំ២០២២ ខណៈក្រុមកម្ពុជា បានធ្វើដំណើរចេញទៅនៅព្រឹកថ្ងៃព្រហស្បត្តិ៍ សប្ដាហ៍នេះ។ មុនចេញដំណើរឯកឧត្តម សុខ សូកាន ប្រធានសហព័ន្ធកីឡាប៊ូល និងប៉េតង់កម្ពុជា បានជួបសំណេះសំណាល និងផ្ដល់ថវិកាលើកទឹកចិត្ត ជូនដល់ប្រតិភូ គ្រូបង្វឹក និងកីឡាករ កីឡាការិនី ផងដែរ។
បើតាមការបញ្ជាក់ពីសហព័ន្ធកីឡាប៊ូលនិងប៉េតង់កម្ពុជា កម្ពុជាមានកីឡាករកីឡាការិនី ចំនួន២០នាក់ គ្រូបង្វឹក៤ និងប្រតិភូចំនួន៣នាក់។ ចំណែកវិញ្ញាសាដែលត្រូវចូលរួមប្រកួតមានចំនួន៦វិញ្ញាសា ដោយក្នុងនោះវិញ្ញាសា បុរស៣នាក់ទល់៣នាក់, នារី៣នាក់ទល់៣នាក់, បុរសវាយយកពិន្ទុ, នារីវាយយកពិន្ទុ, យុវជន៣ទល់៣, យុវជនវាយយកពិន្ទុ។
អ្វីដែលជាពិសេសនោះ ដោយសារតែកាលពីការប្រកួតជើងឯកទ្វីបអាស៊ីលើកទី៣ កន្លងទៅ កម្ពុជាជាម្ចាស់មេដាយមាសលើវិញ្ញាសាបុរស៣នាក់ទល់៣នាក់ និងយុវជន៣នាក់ទល់៣នាក់ ដូច្នេះលើកនេះកម្ពុជា មានសិទ្ធិបញ្ចូលកីឡាករចំនួន២ក្រុមក្នុងវិញ្ញាសាទាំង២នេះ។
សូមរំលឹកថាការប្រកួតជើងឯកប៉េតង់អាស៊ីលើកទី៣ ( The 3rd Asian Boules Sport Confederation Petanque Championship 2019) កន្លងទៅ ធ្វើឡើងនៅអំឡុងខែធ្នូ ឆ្នាំ២០១៩ នៅទីក្រុងហាណូយ ប្រទេសវៀតណាម ដោយមានប្រតិភូ គ្រូបង្វឹក និងកីឡាករកីឡាការិនី សរុបចំនួន១៨រូប។ ជាលទ្ធផលនៅកាលនោះកម្ពុជា ដណ្តើមបានមេដាយ មាស៤ ប្រាក់១ និងសំរឹទ្ធិ១៕
