សិល្បៈអន្តរជាតិ៖ បើនិយាយពីតារាសម្ដែងស្រីចិនដែលល្បីល្បាញបំផុតបច្ចុប្បន្នមានដូចជា Dilraba Yangmi Bailu តែបើនិយាយពីតារាសម្ដែងវ័យក្មេងដែលមានប្រជាប្រិយភាពបំផុតរបស់ចិន តំណែងនេះគ្មានអ្នកណាផ្សេងសមនឹងទទួលបានក្រៅពី Zao Lusi នោះឡើយ។
យុវតីវ័យក្មេងដែលឆក់យកបេះដូងបុរសៗទាំងចិននិងបរទេស។ តារាស្រីរូបនេះមានសមិទ្ធិផលសម្ដែងភាពយន្តភាគទាំងបុរសនិងសម័យជាច្រើនរឿង សុទ្ធសឹងតែជារឿងដែលពេញនិយមនិងមានការគាំទ្រខ្លាំង។ ស្គាល់ Zao Lusi យូរហើយ ប៉ុន្តែមិនទាន់ច្បាស់ ថ្ងៃនេះសូមបង្ហាញជូនរឿងរ៉ាវ៥យ៉ាងដែលធានាថាហ្វេននៅមិនធ្លាប់ដឹងពីតារាស្រីរូបនេះ៖
១. Zao lusi ធ្លាប់ជាតារាសម្ដែងជួរក្រោយឬហៅដោយងាយគឺតួបន្ទាប់បន្សំ តួអមឆាកពីមុនមក។ នៅក្នុងភាពយន្តដំបូងដែលនាងសម្ដែងកាលពីឆ្នាំ២០១៨ រឿង City of Rock កាលណោះនាងសម្ដែងជាតួអង្គគិលានុប្បដ្ឋាយិការ។ ប៉ុន្តែក្រោយពីនោះមិនយូរប៉ុន្មាននាងក៏ទទួលបានឱកាសសម្ដែងជាតួរងនៅក្នុងភាពយន្តភាគ Untouchable Lovers និង Cinderella Chef ដែលធ្វើឱ្យអ្នកទស្សនាមួយភាគធំសួរនាំពីតារាស្រីរូបយ៉ាងខ្លាំង ហើយមិនយូរប៉ុន្មានក្មេងស្រីរូបនេះក៏បានហក់មកសម្ដែងជាតួឯកស្រីតាមរយៈសមត្ថភាពរបស់ខ្លួន។
២. តើអ្នកមានដឹងដែរទេថា មុននឹងចាប់ផ្ដើមជាតារាសម្ដែងអាជីព Zao Lusi ធ្លាប់ល្បីល្បាញនៅលើបណ្ដាញអ៊ិនធឺណិត តាមរយៈរូបភាព Selfie ជាមួយនឹងម៉ូដសក់សេះ ដោយកាលនោះក្មេងៗជាច្រើននាក់បាន Copy យករូបរបស់នាងទៅប្រើប្រាស់ជារូប Profile នៅលើ QQ ដែលជា Platform ល្បីល្បាញនៅចិនសម្រាប់ប្រើប្រាស់បញ្ជូនសារ វីដេអូនិង Group Chat នៅលើអ៊ិនធឺណិត។ ទោះជាកាលណោះស្ថិតក្នុងអំឡុងសិក្សាថ្នាក់វិទ្យាល័យមិនមានការងារសម្ដែង តែនាងក៏ត្រូវបានគេចាត់ចូលជាអាយដលដែលល្បីល្បាញមួយរូបផងដែរ។
៣. Oh! My Emperor ឆ្នាំ២០១៨ គឺជាភាពយន្តភាគដំបូងដែលស្រីស្រស់ Zao Lusi ក្ដាប់បានឱកាសសម្ដែងជាតួឯកស្រី។ រឿងនេះល្បីល្បាញណាស់រកបានចំនួនទស្សនាយ៉ាងច្រើនមហាសាលធ្វើឱ្យនាងទទួលបានរង្វាន់ Golden Bud-The Third Network Film and Television Festival ឬពានរង្វាន់តារាសម្ដែងអនឡាញដែលមានសក្ដានុពលបំផុត។ ថែមពីលើនោះ Zao Lusi ក៏ទទួលបានពានរង្វាន់អ្នកសម្ដែងឆ្នើមពីវេទិកា The 7th Wenrong Awards តាមរយៈតួអង្គដែលនាងសម្ដែងក្នុងភាពយន្តភាគរឿង The Romance of Tiger and Rose ដែលសម្ដែងជាគូនឹង Ding Yuxi កាលពីឆ្នាំ២០២២។
៤.មិនត្រឹមតែការសម្ដែងតែប៉ុណ្ណោះទេ ប៉ុន្តែ Zao lusi ថែមទាំងមានទេពកោសល្យផ្នែករាំនិងច្រៀង មានជាឧទាហរណ៍ស្រាប់ដូចជាបទចម្រៀង It Seem to fall into the Sea of love ដែលនាងសម្ដែងក្នុងរឿង Oh! My Emperor បទចម្រៀង Love Brain Young Girl ពីភាពយន្ត Spring Flower, Autumn Moon និងបទចម្រៀងគូដែលនាងច្រៀងជាមួយនឹង Alec Benjamin ក៏ទទួលបានការសរសើរយ៉ាងច្រើនពីអ្នកគាំទ្រផងដែរ។ ក្រៅពីនោះ Zao lusi ថែមទាំងអាចបាញ់ធ្នូ លេងកីឡាកាយសម្ព័ន្ធ និងអាចលេងតន្ត្រីចិនបុរាណដូចជា កូចើងថែមទៀត។
៥.កាលពីឆ្នាំ២០២១ Zao Lusi មិនត្រឹមតែជាតារាសម្ដែងតែប៉ុណ្ណោះទេ នាងថែមទាំងបន្ថែមអាជីពជាអ្នកជំនួញដោយការបើកទ្វារចូលវិស័យតាមរយៈការបើកហាងនំមានឈ្មោះថា Rosy Wylie នៅខេត្ត ហើងទៀមក្នុងក្រុងចឺចៀង។ ហាងរបស់នាងមានលក់ភេសជ្ជៈជាច្រើនប្រភេទ មាននំផ្អែមតូចធំ និងនំខេកសម្រាប់ភ្ញៀវ ដោយមាននំ Canelé ដែលនាងចូលចិត្តជានំពិសេសប្រចាំហាង ដោយសារតែចំណូលចិត្តនេះហើយទើបធ្វើឱ្យអ្នកគាំទ្ររបស់នាងហៅខ្លួនឯងថា ខើឡូលី ថែមទៀតផង។
