រដ្ឋលេខាធិការតនាគារសហរដ្ឋអាមេរិក លោកស្រី Janet Yellen បាននិយាយនាថ្ងៃ ច័ន្ទ ថា ការទិញប្រេងរបស់ចិនពីរុស្ស៊ី គឺ ស្របគ្នាទាំងស្រុងជាមួយនឹងផែនការរបស់ប្រទេសលោកខាងលិច ក្នុងការរក្សាប្រេងឆៅរុស្ស៊ីនៅលើទីផ្សារពិភពលោក ហើយទីក្រុង ប៉េកាំង នឹងទទួលបានអត្ថប្រយោជន៍ពីយន្តការកំណត់តម្លៃថ្មី ដែលនឹងត្រូវដាក់ក្នុងខែ ធ្នូ ខាងមុខនេះ។ នេះបើយោងតាមការចេញផ្សាយដោយសារព៍ត៌មាន CNA នាថ្ងៃ ច័ន្ទ ទី ១៤ ខែ វិច្ឆិកា ឆ្នាំ ២០២២។
លោកស្រី Yellen បានប្រាប់អ្នកយកព័ត៌មាននៅខាងក្រៅកិច្ចប្រជុំ G20 នៅកោះបាលី ថា ប្រទេសចិន និង អ្នកទិញប្រេងរុស្ស៊ីផ្សេងទៀត នឹងមានអានុភាពបន្ថែមទៀតដើម្បីចរចាតម្លៃទិញក្នុងកម្រិតទាប។
លោកស្រី Yellen បន្ដទៀតថា «យើងមើលឃើញថា តម្លៃកំណត់ គឺជាអ្វីមួយដែលផ្ដល់ផលប្រយោជន៍ដល់ប្រទេសចិន ឥណ្ឌា និង ផ្ដល់អត្ថប្រយោជន៍ដល់អ្នកទិញប្រេងរបស់រុស្ស៊ីទាំងអស់»៕