ក្រុមបាល់ទាត់ជម្រើសជាតិហ្វីលីពីន បានប្រកាសថានឹងប្រកួតមិត្តភាពអន្តរជាតិកម្តៅសាច់ដុំចំនួន២លើកសិន មុនប្រកួតបើកពូល A ប៉ះម្ចាស់ផ្ទះកម្ពុជា ក្នុងពានរង្វាន់បាល់ទាត់ធំជាងគេប្រចាំតំបន់អាស៊ាន AFF Championship ឬ AFF Mitsubishi Electric Cup នៅចុងឆ្នាំនេះ។
លោក Dan Palami អ្នកចាត់ការទូទៅរបស់ក្រុម Azkals ហ្វីលីពីន ដាក់ផែនការប្រកួតមិត្តភាពអន្តរជាតិ២លើក ដោយ៖
-ថ្ងៃទី៨ ខែធ្នូ ឆ្នាំ២០២២ ហ្វីលីពីន ប៉ះ តៃវ៉ាន់
-ថ្ងៃទី១៤ ខែធ្នូ ឆ្នាំ២០២២ ហ្វីលីពីន ប៉ះ វៀតណាម
យ៉ាងហោចណាស់កីឡាករឆ្នើមៗជាង៤០នាក់ស្ថិតនៅក្នុងបញ្ជីដែលត្រូវកោះហៅចូលរួមជំរុំហ្វឹកហាត់ក្នុងក្រុមជម្រើសជាតិហ្វីលីពីន ពីថ្ងៃទី២១ ខែវិច្ឆិកា តទៅនៅទីក្រុងម៉ានីល ក្រោមការដឹកនាំដោយគ្រូបង្វឹកថ្មី។
ជម្រើសជាតិហ្វីលីពីន ស្ថិតក្នុងពូល A នៃពានរង្វាន់ AFF Mitsubishi Electric Cup ជាមួយក្រុមថៃ, ឥណ្ឌូណេស៊ី, កម្ពុជា និងប្រ៊ុយណេ។ ប្រកួតបើកឆាកនៅថ្ងៃទី២០ ខែធ្នូ ឆ្នាំ២០២២ ក្រុមហ្វីលីពីន ត្រូវធ្វើដំណើរមករាជធានីភ្នំពេញ ដោយប៉ះម្ចាស់ផ្ទះកម្ពុជា លើទីលានពហុកីឡដ្ឋានជាតិមរតតេជោ ក្នុងរាជធានីភ្នំពេញ៕
