បន្ទាប់ពីខ្សែប្រយុទ្ធ Cristiano Ronaldo បានចេញទម្លាញអារម្មណ៍ឈឺចាប់នៅក្នុងបទសម្ភាសន៍បើកចំហរជាមួយលោក Piers Morgan ដែលជាពិធីករទូរទស្សន៍ដ៏ល្បីល្បាញនៅចក្រភពអង់គ្លេសសម្រាប់កម្មវិធី TalkTV កាលពីយប់ថ្ងៃទី១៣ ខែវិច្ឆិកា។ បន្ទាប់ពីបិសាចក្រហម Man United យកឈ្នះ Fulham ក្នុងលទ្ធផល ២-១ នៅកីដ្ឋាន Craven Cottage លីគកំពូលអង់គ្លេសសប្តាហ៍ទី១៤។
Ronaldo បានថ្លែងដូច្នេះថា៖«ខ្ញុំមានអារម្មណ៍ត្រូវបានក្បត់ដោយ Man United។ Man United ព្យាយាមបង្ខំខ្ញុំឱ្យចាកចេញ។ មិនត្រឹមតែអ្នកចាត់ការប៉ុណ្ណោះទេ ប៉ុន្តែក៏មានអ្នកផ្សេងទៀត ដែលពាក់ព័ន្ធនៅក្លិប។ ខ្ញុំមានអារម្មណ៍ថា ត្រូវបានគេក្បត់។ ខ្ញុំមានអារម្មណ៍ថា មានអ្នកខ្លះមិនចង់បានខ្ញុំនៅ Man United មិនមែនត្រឹមឆ្នាំនេះទេ តែរដូវកាលមុនផងដែរ»។
«ខ្ញុំមិនមានការគោរពចំពោះលោក Erik ten Hag ទេ ព្រោះគាត់មិនបានបង្ហាញការគោរពចំពោះខ្ញុំ។ វាសាមញ្ញណាស់ បើអ្នកមិនគោរពខ្ញុំ ខ្ញុំក៏មិនដែលគោរពអ្នកដែរ»។
«ខ្ញុំគិតថាអ្នកគាំទ្រគួរតែដឹងការពិតហើយ។ ខ្ញុំចង់បានអ្វីដែលល្អបំផុតសម្រាប់ក្លិប ហើយនេះជាមូលហេតុដែលខ្ញុំត្រឡប់មក Man United»។
«ចាប់តាំងពី Sir Alex Ferguson ចាកចេញពីក្លិប ខ្ញុំមិនបានឃើញការវិវត្តនៅក្នុងក្លិបមួយនេះទេ។ គ្មានអ្វីផ្លាស់ប្តូរទេ។ ហើយគាត់ដឹងច្បាស់ជាងអ្នកណាទាំងអស់ថា ក្លិបមិនស្ថិតនៅលើផ្លូវដែលពួកគេស័ក្តិសមនឹងទទួលបាននោះទេ។ គាត់ដឹង មនុស្សគ្រប់គ្នាដឹង។ មនុស្សដែលមើលមិនឃើញរឿងនេះ គឺដោយសារពួកគេមិនចង់ឃើញ ឬពួកគេខ្វាក់ភ្នែក។ ខ្ញុំស្រលាញ់ Man United ខ្ញុំស្រលាញ់អ្នកគាំទ្រ ពួកគេតែងតែនៅខាងខ្ញុំ។ ប៉ុន្តែប្រសិនបើពួកគេចង់ធ្វើវាឱ្យប្លែក ពួកគេត្រូវតែផ្លាស់ប្តូររឿងជាច្រើន»។
សេចក្ដីថ្លែងការណ៍របស់ Manchester United៖
«Manchester United កត់សម្គាល់ការផ្សាយរបស់ប្រព័ន្ធផ្សព្វផ្សាយទាក់ទងនឹងបទសម្ភាសន៍របស់ Cristiano Ronaldo។ ក្លិបនឹងពិចារណាលើការឆ្លើយតប បន្ទាប់ពីការពិតត្រូវបានលាតត្រដាងឡើង»។
«ការផ្តោតអារម្មណ៍របស់យើង គឺនៅតែលើការរៀបចំផែនការសម្រាប់ពាក់កណ្ដាលរដូវកាលនេះ និងការបន្តនូវសន្ទុះ ជំនឿ និងការរួមគ្នាដែលត្រូវបានបង្កើតឡើងក្នុងចំណោមកីឡាករ អ្នកគ្រប់គ្រង បុគ្គលិក និងអ្នកគាំទ្រ»។
ក្រៅពី Man United ខ្សែប្រយុទ្ធឆ្នើមសញ្ជាតិព័រទុយហ្គាល់វ័យ៣៧ឆ្នាំរូបនេះ ក៏បានវាយបកទៅកាន់អតីតខ្សែប្រយុទ្ធឆ្នើមអង់គ្លេសរូបនេះ យ៉ាងដូច្នេះថា «ខ្ញុំមិនដឹងថា ហេតុអ្វីបានជាគេរិះគន់ខ្ញុំខ្លាំងបែបនេះ? ប្រហែលដោយសារគេបានបញ្ចប់អាជីពរបស់គេ ហើយខ្ញុំនៅតែលេងក្នុងកម្រិតខ្ពស់។ ខ្ញុំមិននិយាយថា ខ្ញុំមើលទៅល្អជាងគេនោះទេ តែជាការពិត»៕
