ក្រុមបាល់ទាត់ខេត្តព្រៃវែង បានប្រកួតចាញ់ក្រុមព្រះខ័នរាជស្វាយរៀង ១ទល់០ លើទីលានវិទ្យាស្ថានជាតិអប់រំកាយនិងកីឡា នៅល្ងាចថ្ងៃអាទិត្យ ទី១៣ ខែមិថុនា ឆ្នាំ២០២១ នេះក្នុងការប្រកួតជម្រុះពូល B នៃពានរង្វាន់បាល់ទាត់ League Cup 2021 By Forward។ គ្រាប់បាល់ជ័យជម្នះរបស់ក្រុមព្រះខ័នរាជស្វាយរៀង រកបានដោយកីឡាករ ជូ ស៊ិនទី នៅនាទីទី៣៣។
តាមពិតការប្រកួតប្រចាំសប្ដាហ៍នេះមានវិសាខា ប៉ះភ្នំពេញក្រោន មួយគូទៀត ប៉ុន្តែដោយសារក្រុមភ្នំពេញក្រោន មានអ្នកវិជ្ជមានជំងឺកូវីដ-១៩ ទើបត្រូវរំសាយការប្រកួតចេញតែម្តង។
សម្រាប់ប្រកួតបន្ទាប់ក្នុងសប្ដាហ៍ទី៣ នឹងធ្វើឡើងនៅថ្ងៃទី១៩ខែមិថុនា ឆ្នាំ២០២១ ខាងមុខដោយពូល A ក្រុម អាយ អេស អាយ ដង្កោសែនជ័យ ត្រូវប៉ះក្រុមវិសាខា លើទីលាន KHM Stadium វេលាម៉ោង៣:៣០នាទី ហើយពូល B ក្រុមព្រះខ័នរាជស្វាយរៀង ប៉ះក្រសួងការពារជាតិ នៅម៉ោង៦ល្ងាច៕
រូបថត៖CNCC