ចៅក្រមនៅប្រទេស ហូឡង់ បានកាត់ទោសបុរសជនជាតិរុស្ស៊ី ២នាក់ និង បុរសជនជាតិអ៊ុយក្រែនម្នាក់ ដាក់ពន្ធនាគារអស់ ១ជីវិតដោយកំបាំងមុខ ពីបទមនុស្សឃាតពាក់ព័ន្ធនឹងការបាញ់ទម្លាក់យន្ដហោះដឹកអ្នកដំណើរ MH17 នៅលើដែនអាកាសអ៊ុយក្រែនកាលពីឆ្នាំ ២០១៤ ដែលបានផ្ដាច់ជីវិតមនុស្ស និង នាវិក ២៩៨នាក់។ នេះបើយោងតាមការចេញផ្សាយដោយសារព៍ត៌មាន CNA នាថ្ងៃ សុក្រ ទី ១៨ ខែ វិច្ឆិកា ឆ្នាំ ២០២២។
អ៊ុយក្រែនបានស្វាគមន៍ចំពោះសេចក្ដីសម្រេចនេះ ដែលនឹងមានផលប៉ះពាល់ចំពោះសំណុំរឿងតុលាការផ្សេងទៀត ដែលទីក្រុង Kyiv បានប្ដឹងរុស្ស៊ី ខណៈដែលទីក្រុង មូស្គូ បានហៅសេចក្ដីសម្រេចនេះថា «រឿងអាស្រូវ» ហើយបាននិយាយថា ខ្លួននឹងមិនធ្វើបត្យាប័នពលរដ្ឋរបស់ខ្លួនឡើយ។
ប្រធានចៅក្រម លោក Hendrik Steenhuis បាននិយាយថា «មានតែការផ្តន្ទាទោសដ៏ធ្ងន់ធ្ងរបំផុតប៉ុណ្ណោះ ដែលសមលម្មនឹងការសងសឹកចំពោះអ្វីដែលជនត្រូវចោទបានធ្វើ ដែលបានបង្កទុក្ខវេទនាជាច្រើនដល់ជនរងគ្រោះ និង សមាជិកគ្រួសាររបស់ជនរងគ្រោះដែលនៅរស់រានមានជីវិត»។
បុរសទាំង ៣នាក់ខាងលើ ដែលត្រូវបានផ្ដន្ទាទោសក្នុងនោះរួមមានអតីតទីភ្នាក់ងារចារកម្មរុស្ស៊ី ឈ្មោះ Igor Girkin និង Sergey Dubinskiy ព្រមទាំងជនជាតិអ៊ុយក្រែនម្នាក់ ឈ្មោះ Leonid Kharchenko ជាមេដឹកនាំនៅក្នុងតំបន់ផ្ដាច់ខ្លួនស្ថិតនៅភាគខាងកើតប្រទេស អ៊ុយក្រែន ខណៈជនសង្ស័យទី៤ ឈ្មោះ Oleg Pulatov ដែលជាជនជាតិរុស្ស៊ី ត្រូវបានដោះលែង។
អ្នកទាំង៣ ត្រូវបានគេរកឃើញថា បានជួយរៀបចំការដឹកជញ្ជូនប្រព័ន្ធមីស៊ីលប្រភេទ BUK ចូលទៅក្នុងប្រទេស អ៊ុយក្រែន ហើយមីស៊ីលនេះត្រូវបានប្រើប្រាស់ដើម្បីបាញ់ទម្លាក់យន្ដហោះ MH17 បើទោះបីជាពួកគេមិនមែនជាអ្នកទាញគន្លឹះបាញ់ដោយផ្ទាល់ក៏ដោយ។
ទោះជាយ៉ាងណាក្ដីប្រទេស រុស្ស៊ី បានចាត់ទុកសាលក្រមរបស់តុលាការហូឡង់ជារឿងគួរឲ្យអាម៉ាស់ ហើយថានឹងមិនធ្វើបត្យាប័នពលរដ្ឋរបស់ខ្លួនជាដាច់ខាត។
សូមជម្រាបថា ជើងហោះហើរ MH17 របស់ក្រុមហ៊ុនអាកាសចរណ៍ម៉ាឡេស៊ី បានចាកចេញពីទីក្រុង Amsterdam ហើយធ្វើដំណើរទៅកាន់ទីក្រុង Kuala Lumpur នៅពេលដែលវាត្រូវបានបាញ់ធ្លាក់នៅភាគខាងកើតអ៊ុយក្រែនកាលពីថ្ងៃទី ១៧ ខែ កក្កដា ឆ្នាំ ២០១៤ ខណៈការប្រយុទ្ធគ្នាបានផ្ទុះឡើងរវាងក្រុមផ្ដាច់ខ្លួនដែលគាំទ្ររុស្ស៊ី និង កងកម្លាំងអ៊ុយក្រែន ដែលជាបុព្វហេតុនៃជម្លោះក្នុងឆ្នាំនេះ។ ឧប្បត្តិហេតុក្នុងឆ្នាំ ២០១៤ បានបន្សល់ទុកនូវបំណែកយន្ដហោះ និង សាកសពជនរងគ្រោះនៅពាសពេញវាលស្រែពោត និង ចំការផ្កាឈូករ័ត្ន៕
