ប្រទេសថៃដែលជាម្ចាស់ផ្ទះនៃកិច្ចប្រជុំកំពូល APEC នឹងជំរុញឲ្យមេដឹកនាំដែលមកចូលរួមកិច្ចប្រជុំនៅទីក្រុង បាងកក ផ្ដោតលើការដោះស្រាយ ការកើនឡើងលើភាពខ្វែងគំនិតគ្នា និង ផ្ដោតលើការដោះស្រាយបញ្ហាសេដ្ឋកិច្ចពិភពលោក ក្នុងវិស័យដូចជា ពាណិជ្ជកម្ម និង អតិផរណា។ នេះបើយោងតាមការចេញផ្សាយដោយសារព័ត៌មាន Arabnews នាថ្ងៃ សុក្រ ទី ១៨ ខែ វិច្ឆិកា ឆ្នាំ ២០២២។
កិច្ចប្រជុំកំពូល APEC ត្រូវបានបង្កើតឡើងដើម្បីលើកកម្ពស់សមាហរណកម្មសេដ្ឋកិច្ច វេទិកាកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក ដែលមានចំណែក ៣៨% នៃចំនួនប្រជាជនពិភពលោក និង ៦២% នៃផលិតផលក្នុងស្រុកសរុប និង ៤៨% នៃពាណិជ្ជកម្មសាកល។
ប្រធានាធិបតីចិន លោក ស៊ី ជីងពីង កំពុងចូលរួមកិច្ចប្រជុំកំពូលនេះ ខណៈដែលសហរដ្ឋអាមេរិកត្រូវបានតំណាងដោយលោកស្រី Kamala Harris អនុប្រធានាធិបតីអាមេរិកវិញ ដោយសារតែលោក បៃដិន ជាប់រវល់មិនបានចូលរួម។
ប្រទេសថៃសង្ឃឹមថា នឹងធ្វើឲ្យវឌ្ឍនភាពលើការបង្កើតតំបន់ពាណិជ្ជកម្មសេរីនៃអាស៊ីប៉ាស៊ីហ្វិក (FTAAP) ចំពោះមុខភាពតានតឹងផ្នែកភូមិសាស្រ្តនយោបាយជុំវិញសង្រ្គាមរបស់រុស្ស៊ីនៅអ៊ុយក្រែន និង ចំណុចសំខាន់ៗផ្សេងទៀត ដូចជា តៃវ៉ាន់ និង ឧបទ្វីបកូរ៉េជាដើម។
យ៉ាងណាម៉ិញ រដ្ឋមន្រ្តីការបរទេសថៃ Don Pramudvinai បាននិយាយកាលពីថ្ងៃ ព្រហស្បតិ៍ថា កិច្ចប្រជុំនៃប្លុកដែលមានសមាជិកទាំង ២១ប្រទេស កំពុងប្រព្រឹត្តទៅក្នុងបរិបទដែលពិភពលោកកំពុងប្រឈមនឹងហានិភ័យជាច្រើន។ លោក Pramudvinai បានគូសបញ្ជាក់ថា «នេះហើយជាមូលហេតុដែល APEC នៅឆ្នាំនេះ ត្រូវប្រឈមមុខចំពោះបញ្ហាទាំងអស់នេះ ហើយផ្ដល់ក្ដីសង្ឃឹមដល់ពិភពលោកទាំងមូល»។
សូមជម្រាបថា បញ្ហាសន្ដិសុខត្រូវបានរឹតបន្តឹងនៅឯកិច្ចប្រជុំកំពូល APEC ដែលប្រព្រឹត្តទៅនៅក្នុងទីក្រុង បាងកក ប្រទេស ថៃ ខណៈក្រុមបាតុករប្រឆាំងរដ្ឋាភិបាលប្រហែល ១០០នាក់ បានប្រមូលផ្ដុំគ្នា ហើយគ្រោងនឹងដង្ហែក្បួននៅឯកន្លែងប្រជុំ៕
