ភាពយន្ត – ថ្មីៗនេះភាគចុងក្រោយនៃរឿង «Love Death+Robots Jibaro» ដែលជាសាច់រឿងវគ្គទី៣នៃភាពយន្តសញ្ជាតិ ព័រតូរីកូ (Puerto Rico) របស់ Netflix កំពុងតែទាក់ទាញបានការចាប់អារម្មណ៍ពីមហាជនព្រោះសាច់រឿងមានភាពស្រដៀងគ្នាទៅនឹងរឿងរបស់នាងសុវណ្ណមច្ឆានិងហនុមាន។
សាច់រឿងក្នុងភាគចុងក្រោយនៃវគ្គទី៣នេះ តួអង្គនាង Jibaro មើលទៅគឺកាន់តែស្អាតជាងមុន ខ្លាំងជាងមុន ចំណែកក្បាច់គុនវិញក៏មានក្បាច់ចំណុះ ពិសេសការពត់ពែនទៅតាមចង្វាក់នៃរបាំបាល់ឡេ ផ្សំដោយឈុតឆាកបង្ហូរឈាម ធ្វើឱ្យរឿងមួយនេះមានការជក់ចិត្តដិតអារម្មណ៍ពីសំណាក់ហ្វេនៗដែលជាអ្នកទស្សនាយ៉ាងច្រើនក្រៃលែង។
យ៉ាងណាមិញរឿងភាគរបស់ព័រតូរីកូមួយនេះ បើតាមការវិភាគរបស់វែបសាយ signalhorizon បានលើកឡើងថាសាច់រឿងដែលគេដឹងនិងស្គាល់ជាទូទៅថា Siren (ទេពមច្ឆា) នេះគឺជារឿងទេវកថាដ៏ល្បាញរបស់ ក្រិច និងរ៉ូម៉ាំង។ នៅក្នុងទេវកថាក្រិច តួអង្គស្រីៗមានរូបរាងមួយកំណត់ជាមនុស្ស មយយកំណត់ជាបក្សី ហើយពួកនាងប្រើប្រាស់សំឡេងដើម្បីដាក់អន្ទាក់បុរសឱ្យចូលទៅចន្លោះថ្មដើម្បីឱ្យសត្វសាហាវសំឡាប់។ បុរសដែលរស់រានមានជីវិតគេចរួចពីស្លាប់ គឺបុរសដែលយកអ្វីមកខ្ទប់ត្រចៀកឬអ្នកដែលអាចយកចម្រៀងផ្សេងមកច្រៀងបន្លប់ប៉ុណ្ណោះ។
មួយវិញទៀតវែបសាយដដែលនេះក៏បានវិភាគចំពោះតួអង្គក្នុងរឿងព្រេងនិទានរបស់ព័រតូរីកូនេះថាដូចនឹងតួអង្គ ទេពមច្ឆាកម្ពុជាផងដែរ។ សម្រាប់រឿងព្រេងទេពមច្ឆានេះ មានជាច្រើនបែបច្រើនសណ្ឋានណាស់ទៅតាមប្រទេសនីមួយៗ សម្រាប់ប្រទេសស្កុតឡែនមានទេពមច្ឆា (Selkies) និងរុស្សីមានទេពមច្ឆា (Rusalkas) គឺសុទ្ធតែជាស្ត្រីដែលស្លាប់យ៉ាងវេទនានៅក្នុងបឹងឬទន្លេហើយត្រលប់មកចាំលងបន្លាចមនុស្សវិញ។ ខណៈដែលនៅអាហ្វ្រិចមាន Mami Watu ព្រលឹងទឹក ដែលបានប្រើប្រាស់សំឡេងដើម្បីជួយបុរសៗពីគ្រោះថ្នាក់។
ខណៈដែលរូបកាយរបស់នាងជាសារធាតុរាវដណ្ដប់ស្បែកមាស និងគ្រឿងអលង្ការដ៏មានតម្លៃ ហើយរស់នៅក្នុងទឹក ដែលអាចប្រដូចទៅនឹងសត្វទឹកជាច្រើន ប៉ុន្តែតួនាងហាក់ដូចជាស្រដៀងច្រើនទៅនឹងតួអង្គ នាងសុវណ្ណមច្ឆា ពីប្រទេសកម្ពុជា និង ឥណ្ឌូណេស៊ី។
សូមសង្ខេបសាច់រឿងវគ្គចុងក្រោយនៃរឿង «Love, Death + Robots Jibaro» គឺនិយាយពីស្ត្រីម្នាក់ដែលបានប្រើប្រាស់សំឡេងនិងរាងកាយស្រោបទៅដោយមាសរបស់នាងដើម្បីបញ្ឆោតឱ្យបុរសៗដល់នូវសេចក្ដីស្លាប់។ នៅពេលបានឮសំឡេងរបស់នាងហើយនោះ បុរសៗទាំងអស់នឹងត្រូវនាងសណ្ដំហើយពួកគេនឹងបង្វិលខ្លួនត្រលប់ខ្លួនហើយវាយសម្លាប់គ្នាយ៉ាងព្រៃផ្សៃមុននឹងលង់ក្នុងទឹកបឹងស្លាប់។ ក្នុងចំណោមបុរសទាំងអស់នោះមានតែបុរសម្នាក់ប៉ុណ្ណោះដែលនៅរស់ ដោយសារតែគេជាមនុស្សថ្លង់។ ការរស់រានរបស់គេបានធ្វើឱ្យ Jibaro យល់ថាគេជាមនុស្សប្រុសខុសពីបុរសដទៃ ប៉ុន្តែនាងគិតខុសព្រោះគេម្នាក់នោះក៏ចង់បានស្បែកមាសនិងគ្រឿងអលង្ការជាប់នឹងខ្លួននាងដូចគ្នា។ តើវាសនារបស់នាងនឹងត្រូវស្លាប់ក្រោមស្នាដៃបុរសនាងបាក់ចិត្តស្រលាញ់ ឬមួយបុរសគថ្លង់រូបនោះគឺជាអ្នកដែលត្រូវស្លាប់ក្រោមស្នាដៃរបស់ Jibaro ?
ចង់ដឹងចម្លើយនៃសំនួរទាំងពីរខាងលើនេះ អាចទស្សនាសាច់រឿងទាំងស្រុងមាននៅលើ Netflix បាន៕
