បុរសជនជាតិអង់គ្លេស Alistair Heath បានចំណាយពេល១៨ខែមកប្រកបអាជីពជាគ្រូបង្វឹកក្នុងទ្វីបអាស៊ី ជាលើកដំបូង ពោលគឺចូលរួមជាមួយក្រុមបាល់ទាត់អង្គរថាយហ្គឺរ (Angkor Tiger FC) សមាជិកលីគកំពូលកម្ពុជា (Cambodian Premier League) ប៉ុន្តែលោកបានត្រឡប់ទៅស្រុកកំណើតខ្លួនវិញ ក្រោយផ្ដាច់កុងត្រាជាមួយក្លិបនៅថ្ងៃទី១ខែកញ្ញា ឆ្នាំ២០២៣។
ក្រោយទៅដល់ប្រទេសអង់គ្លេស វិញបុរសកាន់អាជ្ញាប័ណ្ណគ្រូបង្វឹក UEFA A Licence រូបនេះបានផ្តល់កិច្ចសម្ភាសន៍ទៅកាន់សារព័ត៌មាន mirror.co.uk ពីចំណុចអវិជ្ជមានរបស់ក្លិបអង្គរថាយហ្គឺរ មួយចំនួន។
អត្ថបទពាក់ព័ន្ធ៖អតីតគ្រូអង្គរថាយហ្គឺរ ថាខ្លួនមិនសោកស្តាយចំពោះ បទពិសោធន៍ការងារដ៏ឆ្កួតលីលារយៈពេល ១៨ខែនៅអាស៊ីអាគ្នេយ៍
បន្ទាប់ពីបានដឹងព័ត៌មានអវិជ្ជមានរបស់ក្លិបខ្លួន លោក Akihiro Kato ប្រធានក្លិបអង្គរថាយហ្គឺរ បានចេញសារនៅលើហ្វេសប៊ុករបស់លោកនៅថ្ងៃទី៥ ខែធ្នូ ឆ្នាំ២០២៣ ថា៖«ខ្ញុំមិនចង់និយាយពីអតីតកីឡាករ ឬ អតីតគ្រូបង្វឹក នូវរឿងអវិជ្ជមាននោះទេ ព្រោះខ្ញុំមានក្តីគោរពចំពោះពួកគាត់»។
លោកថា៖«បន្ទាប់ពីអានព័ត៌មានកន្លងមក ខ្ញុំពិតជារីករាយណាស់ដែលខ្ញុំបានបញ្ចប់កិច្ចសន្យាជាមួយនឹងគ្រូបង្វឹកដែលមិនស្មោះត្រង់និងកុហកបោកប្រាស់រូបនេះ»។
បុរសជនជាតិជប៉ុន បន្ថែមថា៖«ជាធម្មជាតិជនជាតិអាស៊ី ចូលជឿជាក់លើជនជាតិមកពីលោកខាងលិច ប៉ុន្តែពិតណាស់ជនជាតិលោកខាងលិចខ្លះស្មោះត្រង់ ហើយខ្លះទៀតកុហកបោកប្រាស់។ យើងនៅតែបង់ប្រាក់ ២០០០ ដុល្លារក្នុងមួយខែដល់គ្រូបង្វឹករូបនេះ ដែលវត្តមានរបស់គាត់មិនបន្ថែមតម្លៃ ឬភាពវិជ្ជមានដល់ក្រុមទាល់តែសោះ។ ជាក់ស្តែងគ្រូបង្វឹកម្នាក់នេះ មិនស្គាល់ពាក្យថា អាម៉ាស់ទេ អាក្រក់ណាស់ ដែលបាននិយាយកុហកទៅកាន់សារព័ត៌មានអន្តរជាតិ»។
អត្ថបទពាក់ព័ន្ធ៖ពីអតីតយុវជន Leicester ចូលនិវត្តន៍ទាំងវ័យក្មេង ក្លាយទៅជា Super Star បាល់ទាត់នៅស្រុកខ្មែរ
លោក Akihiro Kato ចោទជាសំនួរថា តើអ្នកគិតថាយើងគួរតែបើកប្រាក់ខែអោយគ្រូបង្វឹក ដែលនិយាយបង្កាច់បង្ខូចអំពីបាល់ទាត់កម្ពុជា បែបនេះទេ?
លោក Alistair Heath បានធ្វើដំណើរមកកាន់ប្រទេសកម្ពុជា នៅឆ្នាំ២០២១ ដោយចុះកិច្ចសន្យាជាផ្លូវការ ជាមួយអង្គរថាយហ្គឺរ មានមូលដ្ឋាននៅខេត្តសៀមរាប កាលពីថ្ងៃទី១៣ ខែធ្នូ ឆ្នាំ២០២១ បន្ទាប់ពីការចាកចេញ របស់លោកគ្រូ Oriol Mohedano សញ្ជាតិអេស្ប៉ាញ។ មុនមកកម្ពុជា លោកជាគ្រូបង្វឹកក្រុមយុវជនថ្នាលរបស់ក្រុម Leicester ទៀតផង៕
អត្ថបទពាក់ព័ន្ធ៖ល្បីថាគ្រូថ្មីរបស់ក្រុមអង្គរថាយហ្គឺរ ប្រាក់ខែជិត៤ម៉ឺនដុល្លារ?
