សិល្បៈជាតិ៖ អតីតតារាសម្ដែងដ៏ល្បីល្បាញ ដែលអ្នកគាំទ្រស្គាល់លោកច្រើន តាមរយៈតួអង្គ នាយខៀវ ឬ ទុំ ច្រើនជាងឈ្មោះកំណើត ស៊ុក សុភា ទើបតែចេញមកទម្លាយដំណឹង ដ៏រីករាយនូវការទទួលបានសញ្ជាតិអូស្ត្រាលីរបស់ខ្លួនកាលពីពេលថ្មីៗនេះ។
កាលពីថ្ងៃទី១៤ ខែឧសភា ឆ្នាំ២០២៤ អតីតតារាសម្ដែងដែលបានរៀបអាពាហ៍ពិពាហ៍ជាមួយនារីខ្មែរសញ្ជាតិអូស្ត្រាលី អ្នកនាង លុយ សារីនណា កាលពីថ្ងៃទី ២២ ខែមិថុនា ឆ្នាំ២០១២ បានចេញមកបង្ហោះរូបភាពមួយសន្លឹក ព្រមជាមួយនឹង Caption យ៉ាងខ្លីមានភ្ជាប់រូបទង់ជាតិអូស្ត្រាលីថា៖ «ចូលសញ្ជាតិអូស្ត្រាលី Australia Citizens»។ សារខ្លីរបស់លោកដែលបានបង្ហោះនៅលើបណ្ដាញសង្គមនេះ បានបញ្ជាក់ឱ្យមិត្តភក្ដិ និងអ្នកគាំទ្របានទទួលជ្រាបថា នៅពេលនេះលោកទទួលបានសិទ្ធិជាពលរដ្ឋអូស្ត្រាលី ពេញលេញហើយ។
ជាមួយនឹងការចូលរួមអបអរសាទរចំពោះដំណឹងដ៏រីករាយសម្រាប់តារារូបនេះ អ្នកខ្លះក៏បានបង្ហាញការចាប់អារម្មណ៍ដែរថា ការទទួលបានសញ្ជាតិនៅស្រុកគេរាងពិបាកបន្តិច ព្រោះត្រូវឆ្លងកាត់ទាំងការប្រឡងសរសេរនិងការប្រឡងផ្ទាល់មាត់ ដូច្នេះហើយ ទើបត្រូវការប្រើរយៈពេលយូរបន្តិចទម្រាំតែទទួលបានសញ្ជាតិ និងមានសិទ្ធិជាពលរដ្ឋស្របច្បាប់បាន។
គួរដឹងថាលោក ស៊ុក សុភា និង ភរិយា អ្នកនាង លុយ សារីនណា បច្ចុប្បន្នកំពុងរស់នៅយ៉ាងមានសុភមង្គលនៅលើទឹកដីអូស្ត្រាលីជាមួយនឹងកូនៗទាំង៥នាក់របស់ខ្លួន។ ត្បិតថារស់នៅប្រទេសអូស្ត្រាលីជាអចិន្ត្រៃយ៍ តែបុគ្គលល្បី និងមានចំនួនអ្នកតាមដានច្រើនលើបណ្ដាញសង្គមអនឡាញទាំងប្ដីនិងប្រពន្ធមួយគូនេះក៏ឧស្សាហ៍ចេញចូល និងមានកិច្ចការងារផ្សេងៗនៅប្រទេសកម្ពុជាផងដែរ ជាពិសេសគឺលោក ស៊ុក សុភាផ្ទាល់តែម្ដង៕
